4-mujori, investimet publike – 3.8 miliardë lekë më shumë se në vitin 2016
Vëmendja e opinionit publik është e fokusuar gjithnjë e më tepër tek investimet publike, sidomos kur viti buxhetor korrespondon me një “vit elektoral”.
Por krahasuar me vitet e kaluara, ku ka patur një mosrealizim të investimeve, duket se ky fillimviti ka qenë më i mbarë.
Kështu referuar të dhënave të Ministrisë së Financave, shpenzimet kapitale për 4 mujorin e vitit 2017, paraqesin një realizim në masën rreth 14.4 miliard lekë.
Krahasuar me të njëjtën periudhë të vitit 2016, ky zë është rreth 3.8 miliard lekë më shumë. Duke parë këto të dhëna dalin dy anë, ose ka një mirëmenaxhim të financave publike, ose të qënurit vit elektoral ka nxitur vënien në eficencë të investimeve.
Sipas të dhënave, shpenzimet e për investime me financim të brendshëm janë vë vlerën e 10.8 miliardë lekëve ndërsa ato me financim të huaj llogariten 3.6 miliardë lekë.
Por në të njëjtën periudhë të një viti më parë ky zë llogaritej në 6.2 miliardë lekë investimet me financim të brendshëm dhe 4.3 miliardë lekë më financim të huaj.
Referuar të njëjtave burimeve, shpenzimet e përgjithshme të buxhetit të shtetit për periudhën 4 mujore kapin një vlerë prej 128.2 miliardë lekëve, nga të cilat 114 miliardë lekë janë shpenzime korrente, ose siç njihen ndryshe shpenzime operative.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.