4 vjet pa sistem monitorimi të anijeve – Jashtë funksionit që nga 30 marsi i vitit 2017, mjetet shqiptare të peshkimit në “terr”
Strategjia Ndërsektoriale e Menaxhimit të Integruar të Kufirit dhe plani i veprimit 2021–2027 e sapo miratuar nga Qeveria përcakton hapat që do të ndiqen në vitet në vijim, por zbardh një mori problematikash me të cilat përballet aktualisht mbikëqyrja e kufijve në vend. Siç është mungesa e sistemit të monitorimit të peshkarexheve, i cili rezulton jofunksional që prej 4 vitesh.
Sistemi i Monitorimit të Anijeve të Peshkimit është jashtë funksionit që nga 30 marsi i vitit 2017, thuhet në dokumentin qeveritar. Ky sistem është në fazën e prokurimit nga AKSHI dhe pritet që më 2021-shin të implementohet sistemi i ri. SIVHD-ja pritet që të përmirësohet sipas kontratës që Ministria e Mbrojtjes ka nënshkruar me kompaninë amerikane “Lockheed Martin”, në kuadër të detyrimeve që ka RSH-ja në NATO. Projekti i bazës së të dhënave të trafikut detar, është në fazën e implementimi nga AKSHI në bashkëpunim me QNOD-in. Financimi i këtij projekti është deklaruar se do të financohet nga “Border Force”, Mbretëria e Bashkuar.
Në kuadër të bashkëpunimit me partnerët, nga data 17 janar 2020, oficerët e shërbimit 24-orësh pranë sallës operacionale të QNOD-it, kanë akses edhe në aplikacionin “Lloyd’s informa” për marrjen e të dhënave të trafikut detar, të siguruar dhe financuar nga “Border Force”, Mbretëria e Bashkuar.
Gjithashtu është e domosdoshme ngritja e Sistemit të Vëzhgimit të Policisë së Shtetit (PKM) për mbikëqyrjen e hapësirës detare, sistem i cili të jetë burim shtesë informacioni në QNOD, si dhe përcjellja e transmetimit të panoramës së përgjithshme të hapësirës detare në Qendrën Kombëtare të Menaxhimit të Integruar të Kufirit.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.