40 mijë kredi në 6 muaj – 90% e tyre u dhanë për individët
Sistemi bankar shqiptar disbursoi rreth 40 mijë kredi në gjysmën e parë të këtij viti. Në numër, natyrshëm dominojnë financimet për individë, që në gjashtë muaj kaluan shifrën e 36 mijë kredive.
Ndërsa në vlerë u disbursuan mbi 25 miliardë lekë ose rreth 200 milionë euro kredi për këtë segment.
Në segmentin e bizneseve numri i kredive për gjysmën e parë të këtij viti ishte pothuajse 4 mijë. Në vlerë, totali i kredive të disbursuara për biznesin arriti në 61.5 miliardë lekë ose rreth 505 milionë euro.
Mesatarisht, një kredi për individë kishte vlerën e 5500 eurove, ndërsa një kredi për biznesin kishte një vlerë mesatare prej rreth 130 mijë eurosh. Ndërkohë që huadhënia për biznesin siguron volume më të mëdha, ajo për individët mundëson një shpërndarje më të mirë të rrezikut të kredisë.
Ekspozimi mesatar në vlera më të vogla është arsyeja kryesore pse oferta e bankave në vitet e fundit ka qenë më e lartë te individët, sesa te bizneset.
Sipërmarrjet dominojnë portofolin e kredisë së sistemit bankar shqiptar, me rreth 63% të vlerës totale.
Por, nga ana tjetër, individët kanë një raport mesatar të kredisë me probleme shumë më të ulët. Në fund të vitit të kaluar, raporti i kredive me probleme për individët ishte 6.4%, ndërsa për bizneset ky tregues ishte në nivelin 14.3%.
Ersuin Shehu / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.