41.5% më pak turistë në janar. Më shumë vizitorë vetëm nga Kosova dhe Zvicra

Numri i vizitorëve vendas dhe atyre të huaj që kanë hyrë në territorin shqiptar ka pësuar rënie gjatë muajit janar të këtij viti. Këtë tregojnë shifrat e Institutit të Statistikave në publikimin më të fundit rreth lëvizjes së shtetasve. Hyrjet e shtetasve shqiptarë dhe të huaj në territorin e vendit tonë në muajin Janar të vitit 2021, janë 405.799, tregues ky i cili rezulton në rënie me 41,5 % krahasuar me të njëjtën periudhë të një  viti më parë. Gjatë muajit janar Shqipërinë e vizituan  185 329 shtetas të huaj, një rënie prej 25,7%. Kjo rënie pa dyshim është e pritshme duke marrë parasysh situatën pandemike si dhe variantet e reja të virusit të cilat po përhapen. Ndër vendet që kanë regjistruar rritjet e hyrjeve më të larta të shtetasve në Shqipëri janë Zvicra me 47.2% dhe Kosova me 13.0% rritje krahasuar me të njëjtën periudhë të një viti më pare, kur nuk kishte shpërthyer ende pandemia. Ndërkohë nga ana tjetër një ulje të ndjeshme ka pasur Greqia dhe Spanja me 87.0% dhe 73.0% respektivisht, krahasuar me muajin janar të viti të kaluar.

Jo vetëm numri i hyrjeve, por gjithashtu ka rënë edhe numri i daljeve të shtetasve shqiptarë dhe të huaj nga vendi. Krahasuar me të të njëjtën periudhë të një viti më parë shifra e shtetasve shqiptarë që kanë dalë nga territori i Shqipërisë ka rënë me  48,8% e ndërsa dalja e shtetasve të huaj është regjistruar më një rënie në shifrën 42.6%.

Të dhënat tregojnë se këto lëvizje të ndodhura gjatë muajit janar të këtij viti janë dominuar kryesisht nga faktorët personal, pra për qëllime personale, por edhe për pushime, vizita tek të afërmit apo trajtime shëndetësore. Sa i përket lëvizjes së shtetasve sipas mënyrës së udhëtimit, lëvizjet përmes rrugëve tokësore vazhdojnë të mbeten në vend të parë.

Xhorxhina Deda / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.