450 km vijë detare, por importojmë peshk. Prodhojmë vetëm 7,800-8,600 tonë në vit, por edhe konsumojmë shumë pak
Megjithëse gëzon një vijë bregdetare me gjatësi prej 450 km dhe laget nga dy dete, Shqipëria nuk plotëson dot nevojat me prodhimin e vet të peshkut duke ju drejtuar në masë të madhe importit për të plotësuar kërkesën e tregut të brendshëm.
Pavarësisht nga rritja e prodhimit të akuakulturës gjatë viteve të fundit, bilanci tregtar neto për Shqipërinë mbetet në favor të importit. Shqipëria është një importuese neto e produkteve të peshkimit për të përmbushur kërkesën e brendshme. Në mënyrë të veçantë, dhe sipas statistikave të FAO, në dekadën 2009-2018 u tejkalua bilanci neto mesatar vjetor i
produkteve të peshkimit – 6,200 tonë me një maksimum prej 8,276 tonë në vitin 2018. Sipas statistikave zyrtare, konsumi i dukshëm vjetor për frymë i peshkut dhe produkteve të peshkimit është ende i ulët në Shqipëri (8.6 kg) krahasuar me të gjithë Evropën (21.5 kg) në vitin 2017 (FAO, 2020b).
Sipas të dhënave të Organizatës së Ushqimit e Agrikulturës për periudhën 2011–2020, Prodhimi kombëtar i aktivitetit të peshkimit varion midis 7,800 dhe 8,600 tonë në vit me një vlerë në hallkën e parë të shitjes prej rreth 23.56 milionë USD në vitin 2016 (FAO, 2018b).
Me rënien e nivelit të prodhimit vendas nga aktiviteti i peshkimit, për Qeverinë, zhvillimi I mëtejshëm i akuakulturës mbetet mënyra e vetme për të siguruar një prodhim të mjaftueshëm dhe të qëndrueshëm të produkteve të peshkimit në Shqipëri, shkak për të cilin ajo sapo ka miratuar edhe një Udhëzues TË POLITIKAVE MBI ZONAT E PËRCAKTUARA PËR AKUAKULTURË (ZPA) NË SHQIPËRI.
Aktualisht, sektori i akuakulturës në Shqipëri gjeneron rreth 600 vende pune të drejtpërdrejta, duke përfshirë punën me kohë të plotë dhe të pjesshme, si dhe të gjitha punësimet indirekte në aktivitetet ndihmëse ekonomike përgjatë zinxhirit të vlerës (p.sh. përpunimi, shpërndarja, shitja me pakicë, paketimi, pajisjet, industria e ushqimit, shërbimi ushqimor, turizmi etj.).
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.