49 mijë punonjës marrin pagën – Mbi 11 mijë të tjerë në pritje të 40 mijë lekëshit
Afro 49 mijë punonjës kanë përfituar pagën e qeverisë prej 40 mijë lekësh, për pothuajse një javë nga hapja e aplikime, dhe në total janë paguar rreth 2 miliardë lekë. Referuar të dhënave zyrtare të Drejtorisë së Përgjithshme të Tatimeve, në total u janë aprovuar kërkesat 25.873 bizneseve dhe 69.271 punonjësve. Ndërsa janë refuzuar kërkesat për 40 biznese dhe 146 punonjës deri më tani.
Tatimet bëjnë me dije se janë në proves kërkesat e për 1313 biznese të cilat përfshijnë 11.849 të punësuar, në pritje për të përfituar mbështetjen financiare të akorduar në paketën e dytë të qeverisë. Sa i takon kategorive të subjekteve tatimet bëjnë me dije se numri më i lartë i kërkesave është bërë nga të vetëpunësuar me punëmarrës në rreth 9,976; më pas renditen të vetëpunësuar (të vetëm) me 8,461 kërkesa; Punëdhënës me 7,613 kërkesa, ndërsa më pak aplikime regjistrojnë të vetëpunësuarit pa punëmarrës dhe punonjës të papaguar të familjes.
Qeveria ka parashikuar që në total përfitues të jenë 176 mijë punonjës, dhe efektet financiare llogariten në 7 miliardë lekë. Kjo është paketa e dytë financiare për të lehtësuar dëmet ndaj bizneseve, të shkaktuara nga COVID-19, ndërsa në paketën e parë u mbështetën kryesisht subjektet e mbyllura, me një pagesë minimale prej 26 mijë lekësh.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.