50 aplikime në ditë për IPARD – Fluks kërkesash, më 15 Janar përfundon afati për agrobizneset dhe fermerët
15 Janari është afati i fundit për agrobizneset dhe fermerët që duan të aplikojnë për të përfituar nga fondet e programit IPARD II.
Sipas të dhënave të Agjencisë së Zhvillimit Bujqësor dhe Rural, javë e fundit ka pasur një fluks të lartë aplikimesh, ku numërohen mesatarisht 50–të të tilla në ditë.
Në dispozicion për mbështetjen e sektorit bujqësor janë vendosur vendosur 57.6 milionë euro. Sipas AZHBR-së duke u nisur nga problematika e thirrjes së parë, këtë radhë janë bërë disa lehtësira, në mënyrë që subjektet ta kenë më të thjeshtë përthithjen e fondeve.
Kështu, aplikantëve u është dhënë më shumë kohë për plotësimin e dokumentacionit shtesë që kërkohet nga AZHBR në 15 ditë pune dhe janë përfshirë si të lejuara kontratat e huapërdorjes ose kontratat pa kundërshpërblim për marrjen në përdorim të një pasurie, si dhe u është dhënë mundësi për të aplikuar për rikonstruksionin e thertoreve.
Në thirrjen e dytë, do të financohen 3 masa: Investimet në asetet fizike të fermave bujqësore; Investimet në përpunimin dhe tregtimin e produkteve bujqësore; diversifikimi i fermave dhe zhvillimi i biznesit.
Financimi fillon me një minimum prej 10 mijë eurosh dhe maksimum deri në 2 milionë euro. Përqindja e mbështetjes me fonde publike arrin deri në 70 për qind të totalit të shpenzimeve të pranueshme të investimit.
Aplikimet u hapën më 30 Tetor dhe çdo aplikim i mbërritur në zyrat qendrore AZHBR pas datës 15 Janar 2020 do të refuzohet.
Pas mbylljes së kësaj faze, do të nisë verifikimi i tyre dhe më pas përzgjedhja e projekteve që do të mbështeten me grante.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.