50 mln euro kredi për menaxhimin e mbetjeve – Marrëveshja mbërrin në Kuvend, projektet që do të financohen

Qeveria do të marrë 50 mln euro kredi, që do të shkojnë për menaxhimin e mbetjeve të ngurta. Marrëveshja e financimit me KFW ka mbërritur në Kuvend për diskutim, ndërsa ratifikimi i saj do të mundësojë ndërtimin e një sistemi të menaxhimit të integruar të mbetjeve, ku janë planifikuar projektet: Mbështetje për zbatimin e Masterplanit të Menaxhimit të Mbetjeve të Ngurta, Ndërtimin e landfillit rajonal Berat dhe ndërtimi i stacioneve të transferimit të mbetjeve sipas parashikimeve të masterplanit mbetjeve.

Përveç kredisë, në marrëveshje parashikohet edhe një kontribut financimi deri në vlerën 5 mln euro, për zbatimin dhe mbikëqyrjen e projektit , si dhe një kontribut financimi në vlerë të përgjithshme deri në 6.9 mln euro euro, që do të përdoret për investimin. Në relacionin që shoqëron marrëveshjen në Kuvend thuhet se nevojat për financim janë shumë të mëdha, ku sipas draft-masterplanit të menaxhimit të mbetjeve të ngurta, është parashikuar nevoja për financimin e infrastrukturës rajonale dhe lokale për 15 vitet e ardhshme në vlerën 463 559 000 euro, si dhe kosto operative rajonale dhe lokale në vlerën prej rreth 114 082 000 euro/vit. Për tre vitet e ardhshme, në buxhetin e ministrisë, janë planifikuar rreth 20 000 000 euro/vit, për infrastrukturën rajonale.

Ndërkohë që, nga buxheti i shtetit dhe donatorët, për infrastrukturën e sektorit të mbetjeve, parashikohen rreth 20 milionë euro/vit, vlerë e cila është e pamjaftueshme në krahasim me nevojat e sektorit. Sipas relacionit, menaxhimi i mbetjeve është në nivel të ulët, ku në shumicën e rasteve nuk kryhet asnjë lloj trajtimi i mbetjeve, si dhe nuk kryhet procesi i ndarjes së mbetjeve në burim, por mbetjet vetëm mblidhen dhe dërgohen në venddepozitime. Në shumë raste, së bashku me mbetjet shtëpiake, hidhen dhe mbetje të rrezikshme, ndërsa riciklimi është në nivel të ulët.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.