500 mijë USD për konsulencë – Financat hapin tenderin, reformë në mënyrën e të bërit biznes

Plot 59.9 milion lekë apo rreth 500 mijë dollarë do të kushtojë një kontratë konsulencë për hartimin dhe zbatimin e reformave të të bërit biznes. Ministria e Financave dhe Ekonomisë ka hapur tenderin, ndërkohë që ofertat do të pranohen deri në datën 5 prill.

Sipas njoftimit të publikuar në Agjencinë e Prokurimit Publik, objektivi i përgjithshëm i këtij projekti, është përmirësimi i vlerësimit të indikatorëve për reformat e ndërmarra nga Shqipëria për krijimin e një mjedisi të favorshëm për të bërit biznes në vend, duke rritur konkurrueshmërinë e ndërmarrjeve dhe përmirësuar në tërësi situatën socio-ekonomike.

Ndërkohë që, qëllimi i ekspertizës do të fokusohet në ofrimin e konsulencës për hartimin dhe zbatimin e reformave të të bërit biznes, si dhe për ngritjen dhe forcimin e kapaciteteve administrative, përgjegjëse për hartimin dhe monitorimin e politikave, në kuadër të përmirësimit të klimës së biznesit.

Praktikisht fondi limit prej 500 mijë dollarësh do të shkojë për konsulencën në ofrimin e rekomandimeve praktike dhe të përshtatshme mbi reformat e të Bërit Biznes dhe në asistencën për hartimin, zbatimin dhe komunikimin e tyre tek palët e interesuara.

Më konkretisht, shërbimet e konsulencës do të shkojnë në hartimin e një analize të thelluar të kuadrit aktual politik dhe ligjor, si dhe propozimi i nismave, reformave dhe instrumenteve ligjor apo rregullative, që do të lehtësojnë procedurat e të bërit biznes.

Po ashtu, në përfundim të kontratës do të duhet të propozohen reforma konkrete për indikatorët përkatës, si: Hapja e një biznesi, marrja e lejes të ndërtimit, furnizimi me energji, regjistrimi i pasurisë, Marrja e kredisë, mbrojtja e investitorëve, pagesa e taksave, etj.

Gjithashtu, do të duhet të hartohet një plani i ri veprimi afatmesëm si dhe të propozohet një mekanizëm i përshtatshëm dhe i qartë monitorimi, i cili do të vihet në funksion për ndjekjen e ecurisë së çdo aktiviteti apo mase të ndërmarrë në kuadër të përmirësimit të klimës së biznesit.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.