515 euro kredi për individë – Në Tiranë, kredia për frymë është dy herë më e lartë

Çdo shqiptar ka mesatarisht 63 mijë lekë hua bankare, ndërsa për banorët e kryeqytetit kjo shifër është gati dy herë më e lartë. Të dhënat e Bankës së Shqipërisë dhe Instat tregojnë se kredia për frymë është në rritje, e shtyrë nga zgjerimi i huadhënies në sektorin e individëve, por edhe nga rënia e ngadaltë, por e vazhdueshme, e numrit të përgjithshëm të popullsisë.

Duke pjesëtuar vlerën totale të kredisë për individë me numrin e popullsisë, në mesin e këtij viti çdo shqiptar kishte mesatarisht 63 mijë lekë ose rreth 515 euro borxh në sistemin bankar. Krahasuar me një vit më parë, kredia për frymë është rritur me rreth 5%. E ndarë sipas qarqeve, kreditimi për frymë nuk rezervon surpriza shumë të mëdha.

Tirana dominon dukshëm, me 122 mijë lekë për frymë. Ky është një rezultat i logjikshëm i faktit se të ardhurat mesatare në Tiranë janë shumë më të larta dhe aksesi i individëve në financim është rrjedhimisht më i madh. Gjithashtu, fluksi demografik dhe zhvillimi i tregut të pasurive të paluajtshme në kryeqytet kanë qenë faktorë përcaktues në kreditimin më të lartë për individët. Qarku më i afërt, Durrësi, është shumë larg, dhe kredia për frymë është rreth 47 mijë lekë, i ndjekur nga Vlora me 33 mijë lekë për frymë.

Vijojnë dy qarqet më të mëdha te veriut, Shkodra me 29 mijë lekë për frymë dhe Lezha me 25 mijë lekë për frymë. Në veçanti Durrësi dhe Vlora, kanë një zhvillim të konsiderueshëm të tregut të pasurive të paluajtshme, të lidhur me turizmin. Por, ky faktor me siguri ka një ndikim domethënës edhe në qarqet e Shkodrës dhe Lezhës, ku bregdeti i Shëngjinit dhe Velipojës ka regjistruar një rritje të madhe të investimeve në prona. Këto dy qarqe kanë gjithashtu të përbashkët edhe një migracion të brendshëm në përmasa të mëdha, nga zhvendosja e banorëve të zonave malore dhe rurale në qytete. Këto tendenca mund të shpjegojnë, në masë të madhe, një kreditim për frymë më të lartë në raport me qarqet e Shqipërisë qendrore dhe jugore, ku prurjet demografike ardhëse mund të kenë qenë më pak të ndjeshme.

Ersuin Shehu / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.