55 milion euro borxhe nga institucionet – 6-mujori/ Gjyqet e të larguarve nga puna, faturë të “kripur”
Në gjysmën e parë të vitit, fatura e detyrimeve të prapambetura të krijuara nga institucionet publike ndaj bizneseve dhe individëve, arrin vlerën e rreth 6.8 miliardë lekëve apo 55 milionë eurove. Sipas të dhënave zyrtare të Ministrisë së Financave, niveli i detyrimeve ka pësuar një rritje të lehtë krahasuar me periudhën Janar-Mars, kur ky stok regjistrohej në 6,5 miliardë lekë.
Financat bëjnë me dije se më shumë se gjysma e faturës, apo rreth 57.8 përqind e këtij stoku detyrimesh, i referohen detyrimeve për vendime gjyqësore që buxheti i shtetit duhet të paguajë në favor të palëve fituese për ish punonjës të larguar nga puna apo për dëmshpërblime për prishje objektesh nga ana e Inspektoriatit Kombetar i Mbrojtjes së Territorit. Po ashtu, një kosto të lartë kanë edhe vendimet gjyqësore lidhur me rimbursimin e TVSH për bizneset.
Duke nisur nga muaji Dhjetor 2020, monitorimi dhe raportimi i detyrimeve i cili më parë kryhej mbi bazë tremujore nëpërmjet raportimit shkresor të institucioneve do të gjenerohet automatikisht nga Sistemi Informatik Financiar i Qeverisë (SIFQ). Ky ndryshim bëhet në funksion të intensifikimit të rolit mbikqyrës të Ministrisë së Financave dhe Ekonomisë në këtë drejtim dhe monitorimin në kohë të ecurisë së detyrimeve të prapambetura.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.