55 mln euro detyrime – Qytetarët paguajnë gjyqet për largimet nga puna
Qeveria vijon të thellojë borxhin ndaj bizneseve dhe individëve nga vitit në vit, pavarësisht deklaratave optiomiste për të mbajtur nën kontroll detyrimet e prapambetura. Ministria e Financave ka publikuar shifrat për vitin 2018, ku rezulton se fatura e detyrimeve të akumuluara në total është rreth 6.2 miliardë lekë, apo rreth 55 milionë euro. Peshën më të madhe të detyrimeve e zënë ato për vepra infrastrukturore apo borxhet e ndërmarrjeve të ujësjellës-kanalizimeve, në rreth 2.7 miliardë lekë.
Në këtë pikë është bërë një praktikë e zakonshme që prokurohen vepra publike pa pasur buxhetin e nevojshëm, gjë që sjell akumulim të detyrimeve të papaguar, ndërsa reforma në sektorin e ujit mesa duket nuk po funksionon. Po ashtu, një zë tjetër shqetësues është fatura që qeveria paguan për vendime gjyqësore për pushimet nga puna, e cila për vitin 2018 rrumbullakoset në 1.9 miliardë lekë. Ndërkaq, përpos stokut total të mosrimbursimit të TVSH-së, rreth 105 milionë lekë është vlera për vendime gjyqësore që janë fituar nga subjektet në rastet kur ka pasur faturime të gabuara nga ana e punonjësve. Për periudhën Janar 2016- Dhjetor 2017, detyrimet e prapambetura regjistroheshin në 5.7 mld lekë.
Detyrimet e prapambetura 2018
Totali 6.2 mld lekë
Vepra infrastrukturore 2.7 mld lekë
Vendimet gjyqësore 1.9 mld lekë
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.