6 vatra zjarri – Terreni malor vështirëson punën e zjarrfikësve

Terreni malor në disa qarqe ka bërë të pamundur që zjarrfikësit të izolojnë vatrat e zjarrin dhe shuarjen e tyre. Sipas raportimit të Emergjencave Civile në 24 orët e fundit janë shënuar 6 vatra zjarri, ku në disa raste janë rrezikuar shtëpitë e janë djegur pisha e ullinj.

Në qarkun e  Shkodrës vijon operacioni për shuarjen e vatrave të zjarrit në fshatin Karmë të Pukës. Terreni malor e ka vështirësuar punën e zjarrfikësve. Në orët e para të mëngjesit janë rindezur disa vatra të vogla zjarri.

Në fshatin Selckë Dropull ka rënë zjarr në një sipërfaqe me shkurre dhe pisha. Banorë të zonës dhe forca ushtarake kanë shkuar në vendngjarje dhe kanë punuar për shuarjen e zjarrit. Zjarri ka rrezikuar dhe banesat e fshatit. Për këtë është ndërhyrë me anë të helikopterit i cili ka shuar zjarrin.

Zjarri i rënë disa ditë më parë në sipërfaqen pyjore me shkurre dhe pisha në fshatin Skuraj, Kurbin vijon të jetë aktiv. Shërbimi zjarrfikës ka punuar për të shuar flakët por për shkak të erës së fortë dhe terrenit të malor nuk kanë arritur ta izolojnë. Ditën e sotme helikopteri dhe disa forca ushtarake po punojnë të shuajnë zjarrin.

Janë riaktivizuar vatrat e zjarrit të rëna në Poroçan, Gramsh. Për shkak të terrenit malor zjarrfikëset nuk kanë mundur të shuajnë zjarrin. Si pasojë u dogj një sipërfaqe rreth 15 ha me pyll ahu dhe pishe.

Situata duket më e qetë në qarkun e Dibrës dhe Fierit, ku pas ndërhyrjes së zjarrfikësve nga toka dhe nga ajri, vatrat e zjarrit janë shuar.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.