600 mijë fluturime të anuluara në vetëm një muaj – Aeroporti i Heathrow pëson krizën më të madhe nga pandemia

Të paktën 600,000 pasagjerë anuluan planet për të fluturuar nga Aeroporti Heathrow muajin e kaluar pasi varianti i ri Omicron shkaktoi kufizime më të ashpra të udhëtimit. Shefi i Heathrow, John Holland-Kaye tha se kjo nënvizoi krizën në industri dhe pasigurinë me të cilën përballen udhëtarët.

Një rikthim në normalitet “mund të jetë shumë vite larg”, paralajmëroi shefi ekzekutiv i aeroportit më të ngarkuar të Mbretërisë së Bashkuar. Vetëm 19.4 milionë pasagjerë kaluan përmes Heathrow në 2021 – 12.3% nën vitin 2020, viti kur filloi pandemia. Ky numër pasagjerësh ishte më pak se një e katërta e niveleve para pandemisë të parë në 2019.

Frika mbi variantin Omicron Covid nënkuptonte që, nga fundi i nëntorit, të gjithë udhëtarëve që mbërrinin në MB u kërkohej të bënin një test para nisjes dhe të izoloheshin derisa të merrnin një rezultat negativ nga një test PCR pas mbërritjes. Kjo bëri që shumë njerëz të anulonin planet e tyre të udhëtimit gjatë periudhës festive.

Rregullat e reja u lehtësuan për mbërritjet plotësisht të vaksinuar javën e kaluar pasi firmat e udhëtimit thanë se ishin joefektive për shkak të përhapjes së gjerë të Omicron në MB. Heathrow tha se udhëtimi për në dhe nga rajoni i Azisë-Paqësorit në vitin 2021 u godit veçanërisht keq, me një rënie prej 40.3% nga një vit më parë.

Tregjet e tjera me reduktime dyshifrore ishin Europa jo-BE (ulje 13.8%) dhe Amerika e Veriut (ulje 13.6%). Udhëtimet e brendshme e zbutën trendin, me një rritje prej 21.1% në pasagjerë krahasuar me vitin 2020. BBC

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.