62.5 milion lekë për bursën e energjisë – OST: Buxheti, për ngritjen dhe vënien në funksion të Operatorit të Tregut

Operatori i Sistemit të Transmetimit ka planifikuar një buxhet prej 62.5 mln lekësh, që do të shkojë për ngritjen e Operatorit të Tregut, apo thënë ndryshe të bursës së energjisë. Sipas planit të investimeve që OST ka parqitur për miratim pranë Entit Regullator të Energjisë buxheti i vendosur në dispozicion do të shkojë për krijimin dhe vënin e në funksion të bursës, ku përfshihen edhe shpenzimet materiale, shpenzime për personelin, trajnime, etj.

Ngritja e bursës së energjisë është një detyrim ligjor që prej vitit 2015, por deri më tani ajo ka mbetur në letër. Gjatë muajit prill të këtij viti Ministria e Infrastrukturës dhe Energjisë nisi procedurat për zgjedhjen e pjesëmarrësve në Kapitalin e Operatorit të Tregut, por ato u pezulluan për shkak të situatës së krijuar nga COVID-19. Kjo solli një shtyrje të të gjithë procesit, duke bërë që kompanive t’iu lihej një afat i ri për dorëzimin e dokumentacionit. Megjithatë, deri më tani nuk ka asnjë të dhënë mbi ecurinë e këtij procesi.

Sipas legjislacionit në fuqi, Operatori i Tregut duhet të ndahet nga OST, por aktualisht ai është pjesë e strukturës së këtij dikasteri. Ngritja e bursës parashikon listimin e prodhuesve të energjisë elektrike, duke lehtësuar blerjen e energjisë nga të gjithë ata biznese që kanë dalë në treg të lirë, duke siguruar vetë sasinë e nevojshme të energjisë. Nga ana tjetër, pritet që tregtimi me shumicë i energjisë të ulë çmimin për konsumatorët, ndërsa prodhuesit do të kenë mundësi të shesin e blejnë, duke u bërë pjesë e platformave rajonale të tregtimit të saj.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.