Tatimet bëjnë bilancin – 1705 kontrolle dhe 691 shkelje vetëm në muajin korrik

Drejtoria e Përgjithshme e Tatimeve ka publikuar në faqen e saj zyrtare të dhënat e përgjithshme të kontrolleve të kryera në kuadër të luftës kundër informalitetit përgjatë gjithë muajit korrik. Sipas saj vetëm gjatë kësaj jave janë kontrolluar 641 subjekte, mes të cilave janë konstatuar 325 shkelje të legjislacionit tatimor.

Shkeljet më kryesore renditen si më poshtë:

• 28 subjekte janë konstatuar të paregjistruara në organet tatimore, për të cilët është marrë masa e bllokimit deri në momentin e regjistrimit të tyre pranë QKB dhe organeve tatimore.
• 24 tatimpagues janë konstatuar se nuk kanë pasur të instaluar pajisjet fiskale dhe 11 të tjerë nuk i mbanin pajisjet fiskale në gjendje pune.
• 26 tatimpagues janë penalizuar pasi janë konstatuar me punonjës të padeklaruar, nga të cilët 23 subjekte janë të përgjegjësisë tatimore “biznes i vogël” dhe 3 subjekte janë të përgjegjësisë tatimore “biznes i madh”.
• 71 tatimpagues të penalizuar për shkeljen e moslëshimit të kuponit tatimor (rasti i parë), ndërsa 3 tatimpaguesve u janë bllokuar ambientet për 30 ditë kalendarike për moslëshim kuponi tatimor (hera e dytë).
•  45 tatimpagues janë konstatuar se dispononin mallra pa dokumentacion tatimor.

Gjithashtu DPT bën me dije se përgjatë gjithë muajit Korrik janë kryer gjithsej 1,705 kontrolle, ndërsa janë konstatuar 691 shkelje të legjislacionit tatimor.

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.