“65% e ujit vidhet ose humb në rrjet” – ERRU: Asnjë përmirësim edhe për furnizimin, mesatarja mbetet 13.8 orë/ditë
“Uji Pa të Ardhura”, që është një nga treguesit kryesorë për performancën e ujësjellësve pësoi një përmirësim të lehtë gjatë vitit 2021, por gjithsesi mbetet në nivele tejet të larta. Sipas të dhënave nga Enti Rregullator i Ujit, për vitin 2021 64.7% e ujit të prodhuar nuk u pagua nga 65.4% që ky tregues ishte një vit më parë, duke shënuar një rënie me 0.7%.
ERRU analizon faktorët e kësaj situate në Bilancin e Ujit, sipas të cilit humbjet e dukshme, ku bëjnë pjesë pikërisht vjedhjet, nënfaturimet dhe lidhjet e paligjshme përbëjnë mesatarisht 48.9% të humbjeve të përgjithshme, ndërkohë që pjesa tjetër shkaktohet si pasojë e rrjeteve të amortizuar. Nga ana tjetër, gjatë vitit 2021 kohëzgjatja mesatare e furnizimit me ujë nuk pati asnjë ndryshim, duke mbetur në 13.79 orë/ditë. Sipas ERRU-së, kohëzgjatja e Furnizimit me Ujë lidhet direkt me cilësinë e shërbimit ndaj konsumatorëve.
Ndërkohë që, objektivi afatshkurtër i qeverisë qendrore me investime nga buxheti i shtetit nëpërmjet Agjencisë Kombëtare të Ujit dhe Mbetjeve është të ofrohet shërbimi i furnizimit me ujë 24 orë deri në vitin 2023 për 58 nga 66 qendra urbane, teksa për zonat rurale nuk ka asnjë parashikim. Në rang vendi, aktualisht furnizimi i pandërprerë me ujë përfshin vetëm 29 qendra urbane të banuara.
Nisur nga këta tregues, ERRU kërkon agregimin sa më të shpejtë të sektorit, që parashikon bashkimin e disa kompanive të ujësjellësve në një të vetme, duke nisur me disa shembuj pilot, që më pas mund të shtrihen në të gjithë vendin.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.