692 biznese më shumë në Tiranë në tremujorin e parë – Dominojnë dyqanet e shitjes me pakicë dhe njësitë e shërbimit
Në fund të tremujorit të parë të këtij viti, në Bashkinë e Tiranës numëron 692 biznese aktive më shumë nga sa deklaronte DPTTV në fund të vitit 2017.
Rritja më e madhe ka ardhur në segmentin e bizneseve të mëdha dhe të vogla kryesore. Kjo do të thotë se rritja e hapësirës së sipërmarrjeve në Tiranës është shpërndarë njëtrajtësisht si me shtimin e bizneseve të vogla, ashtu edhe të mëdha.
Ndërsa sa i takon tatimpaguesve të mëdhenj, apo të ashtuquajturave biznese VIP, ato janë rritur në segmentin e subjekteve sekondare, pra degëve të tjera me 42 njësi më shumë.
Gjatë kësaj periudhë, numri i subjekteve që janë mbyllur duke aplikuar për çregjistrim apo kalim në status pasiv është 1143 biznese, kundrejt 2532 bizneseve të reja që janë hapur gjatë kësaj kohe.
Bizneset e reja janë të përqendruara përgjithësisht në aktivitetet e shitjes me pakicë, ndjekur nga njësitë e shërbimit. Në shtim më të moderuar janë edhe bizneset që kanë si veprimtari shitjen me shumicë, profesionet e lira, si dhe njësitë e prodhimit.
Shtimi i sipërmarrjeve ka rezultuar edhe në një rritje të lehtë të bizneseve të regjistruara për taksën e pasurisë.
Ndërkohë, motorët kryesorë të ekonomisë për nga aktiviteti i bizneseve vijojnë të jenë zona e qytetit, si dhe Njësia Administrative e Kasharit, e cila përfshin bizneset përgjatë autostradës Tiranë-Durrës, si dhe NJA Farkë, ku ka patur një rritje të vogël të bizneseve të mëdha dhe VIP.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.