7 mln euro për blerje energjie – Tjetër shpenzim për nëntorin, fatura vjetore kapërcen në 86 mln euro
Rreth 7 mln euro është vlera e shpenzuar nga Furnizuesi i Tregut të Lirë për blerje energjie, me qëllim plotësimin e nevojave konsumatore për periudhën 8-22 nëntor nëntor. FTL, që është një prej kompanive të krijuara nga ndarja e OSHEE ka kryer 3 procedura për sigurimin e energjisë, teksa çmimi mesatar përllogaritet në 53.5 euro/mwh.
Me blerjen e fundit fatura për blerjen e energjisë përgjatë vitit 2020 shkon në 86 mln euro. Sipas të dhënave zyrtare, 60.1 mln euro u shpenzuan për periudhën janar-gusht, ndërkohë që pjesa tjetër është përpunuar nga TV SCAN sipas të dhënave të bëra publike nga OSHEE dhe i takon energjisë së blerë në periudhën nga shtatori deri në mesin e muajit nëntor.
Ky vit është dominuar nga shpenzime të larta për blerjen e energjisë, teksa një zbutje e faturës u vu re në muajin tetor, në raport me muajt paraardhës, e ndikuar nga reshjet gjatë këtij muaji. Megjithatë, faturat e kripura për pjesën tjetër të vitit reflektojnë uljen e prodhimit të energjisë për shkak të situatës jo të favorshme hidrike, ndërsa nxjerrin edhe një herë në pah nevojën që ka vendi ynë për diversifikimin e burimeve të prodhimit të energjisë.
Aktualisht, është lidhur kontrata për ndërtimin e një parku fotovolatik në zonën e Karavastasë, ndërsa pritet që të hapet ankandi për një central të ngjashëm edhe në zonën e Spitallës. Paralelisht, edhe sektori privat ka shprehur interes për këto investime, teksa një aplikim për ndërtimin e një impianti me kapacitet 50 MW ka mbërritur pranë Ministrisë së Infrastrukturës dhe Energjisë.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.