$7 mln në import armësh, Shqipëria e 91-ta në botë – Gjermania i zë vendin Francës
Shqipëria importoi armë në vlerën e 7 milionë dollarëve gjatë vitit 2015, tregojnë të dhënat e Institutit Ndërkombëtar të Paqes së Stokholmit. Armët e importuara gjatë 2015-ës kanë si vend origjine Gjermaninë.
Sipas regjistrit tregtar, bëhet fjalë për dy helikopterë të llojit EC145. Me Gjermaninë, Shqipëria duket se thyen trendin e viteve të fundit, kur Franca mbizotëron si importuesi kryesor i armëve pavarësisht se në sasi të vogla.
Të dhënat tregojnë se gjatë 2012, 2013, dhe 2014-ës Franca ka importuar armë në vendin tonë në vlerën e 15, 7 dhe po 7 milionë dollarëve, për një total prej 29 milionë dollarësh. Edhe këtu flitet për helikopterë, 4 të llojit cougar.
Në vitet 2003 dhe 2005 ka qenë Italia vendi i origjinës së armëve të importuara në vendin tonë.
Pas viteve `90, importi i armëve në vendin tonë është mjaft i vakët, në një shumë totale prej 75 milionë dollarësh, dhe ku Franca mbetet furnizuesi numër një, me 29 milionë dollarë, e ndjekur nga Kina me 26 milionë dollarë, Gjermania me 11 milionë dollarë, dhe Italia me 9 milionë dollarë.
Që prej vitit 1950, e deri më sot, Shqipëria ka importuar armë në vlerën e 2.8 miliardë dollarëve, me Kinën që mbetet furnizuesi kryesor. Kina na ka shitur armë në vlerën e rreth 2.2 miliardë dollarëve, nga 2.8 miliardë që është totali.
Për vitin 2015, Shqipëria rezulton të jetë vendi i 91-të më i madh importues i armëve në botë, ndër 121 shtete importuese.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.