72% e bashkive mbetën me arkën bosh – Tërmeti dhe Covid-19 uli aftësinë paguese të bizneseve dhe individëve
Afro 72 për qind e bashkive në vend, apo e thënë ndryshe 44 prej tyre, u përballën me rënie të theksuar të të ardhurave nga burimet e veta vendore në gjysmën e parë të vitit, si rrjedhojë e tërmetit të 26 nëntorit dhe pandemisë Covid-19. Referuar raportit të Financave Vendore të hartuar nga CoPLAN, për shkak të frenimit të aktivitetit ekonomik përgjatë periudhës së karantinës dhe vështirësive që hasën bizneset, duke u përkthyer edhe në rritje të papunësisë dhe përkeqësimin e gjendjes financiare të bizneseve dhe individëve, 61 bashkitë në vend, pësuan rënie të të ardhurave nga burimet e veta vendore, me rreth 23.8% në terma vjetorë përgjatë gjysmës së parë të vitit 2020.
Po ashtu rënia ka qenë edhe si pasojë e shtyrjes së pagesave të detyrimeve në disa bashki për shkak të situatës emergjente të COVID-19. Rënia luhatet në një interval nga rreth -2% deri në -63.7%. Në afro 68% të bashkive (30/44 bashki) rënia e të ardhurave rezulton të jetë mbi 20% në terma vjetorë. Ecuria e të ardhurave të bashkive nga burime të veta vendore vijon të përcaktohet nga një numër i kufizuar taksash, si taksa e ndikimit në infrastrukturë nga ndërtimet e reja dhe nga taksa mbi ndërtesat.
Ndërkohë që sipas raportit, diferencat dhe pabarazitë në kapacitetin financiar të bashkive vijojnë të jenë të qenësishme, duke kushtëzuar ofrimin cilësor të shërbimeve publike vendore dhe përballimin e pasojave të fatkeqësive natyrore (si tërmetet e shtatorit dhe nëntorit 2019, pandemia e COVID-19). Diferencat në kapacitet financiar kushtëzojnë dhe ndikojnë në përgjigjen dhe aftësinë e tyre ripërtëritëse në vijim të këtyre goditjeve.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.