80 milionë euro në vit humbje nga duhani – Projektligji i ri/ Reformohet industria, gjoba deri në 1 milion lekë për shkelësit
Afro 25-30% e konsumit të duhanit në vend është informal, duke shkaktuar një humbje për buxhetin e shtetit në vlerën e 20-25 milionë euro. Nëse ky konsum informal konvertohet në cigare të shitura nga furnizuesit formalë, humbjet për buxhetin e shtetit llogariten rreth 80 milionë euro në vit, ndërkohë që industria ka problematika të shumta në të gjitha hallkat e zinxhirit kultivues-grumbullues-përpunues që ka çuar në uljen e sipërfaqes së mbjellë si dhe deformimin e tregut.
Ndryshimet në ligj të bëra deri më tani mesa duket nuk kanë dhënë efektin e duhur për formalizimin e kësaj industrie dhe për këtë arsye është hartuar një projektligj i ri në bashkëpunim me grupet e interesit për “vënien në shina” të këtij sektori. Kështu, projektligji “Për kultivimin, grumbullimin, përpunimin, prodhimin dhe tregtimin e duhanit dhe të produkteve të tij i cili është depozituar për diskutim në komisionet parlamentare rregullon krijimin e garancisë bankare në masën 100% të vlerës së duhanit të grumbulluar dhe shlyerjen e detyrimit financiar jo më vonë se 30 ditë nga dita e blerjes së duhanit.
Projektligji përcakton rregulla të qarta për kultivimin e duhanit duke sanksionuar në ligj lejimin e kultivimit të duhanit vetëm nëse fermeri ka një kontratë me një grumbullues-përpunues, duke kontrolluar në këtë mënyrë territorin e mbjellë me duhan. Po ashtu, ritheksohet detyrimi për pajisjen me pullë fiskale çdo produkt duhani në treg si dhe rastet kur ndalohet tregtimi i duhanit dhe i produkteve të duhanit.
Gjithashtu, në këtë projektligj, janë përcaktuar rregulla të reja për kontrollin e produkteve të duhanit të pranishme në tregun shqiptar, kundërvajtjet administrative dhe sanksionet për këto kundërvajtje. Gjobat e parashikuara fillojnë nga 50 mijë deri në 1 milionë lekë, sipas shkeljes. Në draft përcaktohet regjistrimi i produkteve të duhanit në regjistrin përkatës; rregullat e licencimit të grumbullues-përpunuesve të duhanit; rregullat e kultivimit të duhanit, etj.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.