9 kryebashkiakë shqiptarë bashkohen për të kërkuar investime në Gjermani! Bashkëpunim me tre bashki gjermane   

Krerët e disa prej bashkive të rëndësishme të vendit kanë nisur një vizitë zyrtare 5 ditore në Gjermani, me synim tërheqjen e investimeve në zonat e tyre. Referuar njoftimit nga Shoqata për Autonomi Vendore, janë 9 krerë bashkish të Shqipërisë që do të zhvillojnë takime me kryebashkiakët e Landin të Rinit të Westfalisë Veriore, në Republikën Federale të Gjermanisë.

Kryebashkiakët e Fierit, Korçës, Vlorës, Librazhdit, Patosit, Roskovecit, Bulqizës, Mirditës, Gramshit do të takohen me kryetarët e bashkive Dusseldorf, Hagen dhe Essen, me fokus zhvillimin e projekteve pilote në zona të ndryshme të Shqipërisë.

“Bashkëpunimi mes bashkive shqiptare dhe atyre gjermane, parashikohet të shtrihet në fushat e administrimit komunal dhe mjedisit, menaxhimit të mbetjeve të të gjitha llojeve dhe integrimit të koncepteve të energjive të rinovueshme nga bashkitë shqiptare në lokalitetet e tyre.  Nga ana tjetër, të pranishëm në këtë vizitë, biznesmen nga Shqipëria do të prezantojnë produktet dhe ofertat e tyre lokale. Ndërkohë, janë ftuar edhe biznesmenët nga diaspora shqiptare në gjermani, të cilët do të njihen me mundësitë që ofrojnë bashkitë e vendit tonë në lidhje me potencialin për investime të huaja” njofton shoqata.

Kjo vizitë përkon me 30 vjetorin e rivendosjes së marrëdhënieve diplomatike mes Shqipërisë dhe Gjermanisë, dhe përpos takimeve bilaterale ajo do të kulmojë me zhvillimin e Konferencës me temë: “Dita e Dialogut me Diasporën”.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.