9 mijë biznese, në “sitën” e tatimeve – Nëntor-Dhjetor, shënjestra tek call center, ndërtimi dhe fasoneria

Mbi 9 mijë biznese kanë kaluar në lupën e kontrolleve tatimore gjatë 4 muajve të fushatës antiinformalitet.

Referuar të dhënave zyrtare nga Drejtoria e Përgjithshme e Tatimeve për periudhën 4 korrik, kur dhe nisi plani operacional deri më 31 tetor 2019, u kryen rreth 9150 kontrolle, ndërsa u konstatuan në shkelje të legjislacionit tatimor rreth 3 mijë subjekte të kategorive të ndryshme, apo rreth 33 për qind e totalit, për të cilat janë marra masat përkatëse që nga paralajmërimi, gjoba e deri tek bllokimi i aktivitetit.

Abuzimi më i lartë është konstatuar në sektorin e shërbimeve, pasi ishte sektori më me qarkullim gjatë periudhës së kontrolleve, ndërsa kishte edhe fokusin kryesor.

Numri më i madh i shkeljeve të konstatuara, lidhet me  subjekte të paregjistruara në organet tatimore; tatimpagues të penalizuar për shkeljen e moslëshimit të kuponit tatimor; tatimpagues te penalizuar pasi janë konstatuar me punonjës të padeklaruar, tatimpagues që nuk kanë pasur të instaluar pajisjet fiskale si dhe subjekte që dispononin mallra pa dokumentacion tatimor.

Por çfarë do të ndodhë në dy muajt në vijim, deri në mbyllje të vitit? Sipas Drejtorisë së Përgjitshme të Tatimeve, aksioni do të vijojë intensivisht me monitorimin dhe verifikim i informalitetit në zonat dhe sektorët me risk; Verifikim i deklarimit të punonjësve në tre sektorë kryesorë – ndërtim, call center, fasonë dhe nëndeklarimi i pagave në të gjithë sektorët; Verifikim i tatimpaguesve që kanë qarkullim të madh dhe detyrime të papaguara.

Ndërsa nga viti i ardhshëm, bizneset në shkelje do të përballen me gjoba në rritje dhe progresive sipas kategorisë së subjekteve.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.