94 mijë gjoba për parkimet – Janar-Qershor 2018, rritet numri i shkeljeve në kryeqytet

Rreth 94 mijë gjoba janë vendosur për qytetarët që kanë parkuar automjetet në vende të palejuara në kryeqytet vetëm në 6 muajt e parë të vitit.  Megjithëse pothuajse në të gjithë Tiranën janë përcaktuar dhe vijëzuar vendparkimet e lejuara të automjeteve, të cilat janë bërë me pagesë, duket se qytetarët kanë anashkaluar rregullat, duke e pësuar dhe u ndëshkuar me masa administrative.

Të dhënat janë raportuar nga Policia Bashkiake e kryeqytetit, të cilat janë hedhur në sistemin e gjobave dhe konkretisht janë vendosur 94.050 gjoba. Nëse bëjmë një llogaritje të thjeshtë, pasi një masë administrative për parkim të gabuar është 1 mijë lekë, duket se Bashkia e Tiranës ka arkëtuar vetëm në gjysmën e parë të vitit 94 milion lekë nga ky zë.

Ndërsa për gjatë gjithë vitit 2017, Policia Bashkiake ka vendosur 118.670 gjoba për parkim të gabuar. Shifrat tregojnë numri në rritje të masave administrative të ndërmarra në raste shkeljesh dhe mosndërgjegjësimin e qytetarëve, pavarësisht se një parkim i gabuar ndikon direkt në xhepin e tyre.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.