A do të kemi një pilulë antiCovid deri në fund të vitit?! – Do të blihet në farmaci dhe do të merret në simptomat e para
Investime të mëdha nga qeveria amerikane për të zhvilluar një pilulë anticovid deri në fund të vitit 2021: ajo do të blihet në farmaci dhe do të merret në simptomat e para.
Gjatë vitit të kaluar, forcat globale janë përqendruar në një qëllim: mposhtjen e Covidit. Për ta bërë këtë, qeveritë më të fuqishme kanë financuar studiues dhe shkencëtarë nga e gjithë bota për të zhvilluar – shpejt – një vaksinë që mund të funksionojë. Kjo përpjekje e përbashkët ka rezultuar në disa vaksina efektive që janë në dispozicion në vetëm një vit. Tani që fushata e vaksinimit vazhdon me shpejtësi, qeveria amerikane ka vendosur të financojë një lloj tjetër të hulumtimit, i cili deri më tani ishte lënë mënjanë: ai i një pilule anticovid.
Departamenti Amerikan i Shëndetit dhe Shërbimeve Njerëzore (HSS) zbuloi Programin Antiviral për Pandemikat në 17 Qershor, një program që do të kontribuojë më shumë se 3 miliardë dollarë në zhvillimin e një ilaçi të ri që lejon këdo, sapo të shfaqen simptomat e para, për ta marrë atë dhe për të ndaluar koronavirusin në syth. Nëse gjithçka shkon siç është planifikuar, pilulat e para mund të jenë gati deri në fund të vitit 2021.
Deri më tani ilaçi i vetëm i aprovuar nga FDA që është treguar i efektshëm kundër virusit Covid ka qenë remdesivir (i zhvilluar fillimisht si një kurë e mundshme për virusin Ebola), por përdoret në pacientët e shtruar në spital të cilët jepen në mënyrë intravenoze. Formulimi i tij aktual, në fakt, nuk lejon marrjen e tij orale gjatë fazave të para të sëmundjes, pasi përbërja nuk do t’i mbijetonte kalimit nga goja, në stomak deri në sistemin e qarkullimit të gjakut.
Tani studiuesit në të gjithë botën po studiojnë antivirale të tjera të njohura tashmë për të parë se si reagojnë ata ndaj koronavirusit SARS-CoV-2. Ky është rasti i molnupiravir, i zhvilluar në 2019 dhe efektiv kundër disa viruseve, testet e të cilit, pasi pësuan një pengesë të parë në prill 2020 (për shkak të rezultateve të dobëta të gjetura në pacientët e shtruar në spital), u rifilluan vjeshtën e kaluar tek pacientët në fazat e hershme të sëmundjen dhe po japin rezultate të mira.
Një ilaç tjetër që ka marrë vëmendjen e qeverisë amerikane është AT-527, tashmë efektiv kundër hepatitit C, i cili sipas analizave të para mund të funksionojë edhe kundër Covidit. Kompania farmaceutike Pfizer është gjithashtu në krye të hulumtimit për një pilulë anticovid dhe po zhvillon një nga një molekulë e krijuar në fillim të viteve 2000 për të luftuar SARS.
Ndoshta hulumtimi filloi shumë vonë, dhe mbase tabletat e para antivirale nuk do të jenë në dispozicion për disa vjet: por, edhe sikur të ishte kështu, do të ishte ende një investim për të ardhmen. Mos të harrojmë se, në botën e globalizuar në të cilën jetojmë, (fatkeqësisht) do të duhet të mësohemi me përhapjen e viruseve dhe pandemive të reja. Financimi i hulumtimeve tani është akoma një ide e mirë: “Mund të na ndihmojë me këtë pandemi dhe të na sigurojë një linjë të parë mbrojtëse kundër tjetrës”, thekson Mark Namchuk (Shkolla Mjekësore e Harvardit) në një artikull të New York Times.
Programi HHS, në fakt, jo vetëm mbështet hulumtimin e ilaçeve kundër Covidit, por edhe kundër patogjenëve të tjerë me rrezik të lartë, të tilla si flaviviruset (të cilat shkaktojnë, ndër të tjera, ethet e verdha, ethe të Nilit dhe dengën) ose alfaviruseve (që shkaktojnë sëmundje të lidhura me mushkonjat). “Gjithmonë do të ketë një kërcënim”, thotë Anthony Fauci, mbështetësi kryesor i programit, “Do të ketë gjithmonë nevojë për ilaçe”. (Focus)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.