A ka nisur vala e dytë e virusit në Europë?Apeli i Merkel: Ju lutem, nëse mundeni, qëndroni në shtëpi dhe mos udhëtoni

Janë 39 milionë e 266 mijë e 928 rastet e konfirmuara pozitivë me Covid 19 në mbarë botën e 1 milionë e 103 mijë e 517 numri i viktimave të shkaktuara nga ky virus. Shtetet e Bashkuara të Amerikës rezultojnë se janë për momentin më të prekurat, të ndjekur nga India e Brazili. Ndërkohë, në Europë ka nisur të shtohet numri i personave të prekur.

Për t’u përballur me atë që duket se është vala e dytë e virusit, qeveria gjermane ka vendosur të marrë shtrëngime të tjera, duke kufizuar festat private dhe duke reduktuar orarin e mbylljes së restoranteve e bareve.

Apeli i kancelares Merkel: Qëndroni në shtëpi dhe mos udhëtoni

Autoritetet shëndetësore gjermane kanë regjistruar 7.830 raste të reja në 24 orët e fundit, duke shënuar një rekord të ri për Gjermaninë që nga fillimi i pandemisë. “Tani duhet të bëjnë gjithçka që virusi të mos përhapet në mënyrë të pakontrolluar. Çdo ditë vlen. Ju lutem:Hiqni dorë nga çdo udhëtim që nuk është I domosdoshëm, nga çdo festim që nuk është absolutisht i domosdoshëm. Ju lutem, kur është e mundur qendroni në shtëpinë tuaj” ka apeluar Merkel në një mesazh video të ditës së shtune.

Mbylljet në Europë

Në Katalonjë është dekretuar mbyllja për 15 ditë e bareve e restoranteve ndërsa në Francë, Macron  ka njoftuar shtetrrethim pas orës 21:00 në Paris, Grenoble, Lille, Lion, Aix-Marseille, Rouen, Tuluzë e Montpellier. Masat shtrënguese në vende të Europës po shtohen gradualisht më shtimin e rasteve.

Ndërkohë, Banka Botërore ka bërë të ditur se do të vendosë në dispozicion 12 miliardë dollarë për të ndihmuar vendet në zhvillim që të blejnë dhe shpërndajnë vaksinën, testet dhe kurat.

Europa po përjeton atë që është cilësuar si vala e dytë: javën e kaluar numri i rasteve të konfirmuara në kontinentin e vjetër ka qenë thuajsde 3 herë më i madh se ai i marsit të kaluar. Nga sot, Franca aplikon shtetrrethimin nga ora 21:00 deri në 6 të mëngjesit kurse në Belgjikë, kafet dhe restorantet do të mbyllen duke e nisur nga kjo e hënë për 4 javë. Në Mbretërinë e Bashkuar, në Londër do të hyjnë në fuqi shtrëngime e masa që ndalojnë eventet që bashkojnë nëpër shtëpi persona që nuk banojnë aty.

Marre me shkurtime nga La Stampa

Pershtati ne shqip: SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.