A mund të ketë një shans të ri për ata që s’kanë bërë deklarimin e vendbanimit ende? Sot afati i fundit, nga nesër gjoba!
Duke nisur nga dita e nesërme, qytetarët që nuk kanë deklaruar ende vendbanimin do të përballen me penalitetet që parashikon ligji. Afati i amnistisë përfundon ditën e sotme e mundësia për t’u shtyrë me pak ditë ky afat, deri në mbylljen e procedurave të nisura, është thuajse e pamundur për faktin se për një vendim të tillë do të duhej të mblidhej Kuvendi në seancë plenare.
Por çfarë do të ndodhë me ata që nuk kanë arritur të mbyllin procedurat e deklarimit të vendbanimit? A do të përballen ata me penalitetet që parashikon ligji?
Parimisht PO, megjithatë nuk përjashtohet mundësia që të ketë një shans të dytë.
Ligjërisht ekziston një mundësi për të mos penalizuar qytetarët që për arsye të ndryshme nuk kanë arritur të bëjnë deklarimin e vendbanimit apo të banesave të dyta në afatin 6 mujior të amnistisë.
Me mbledhjen e Kuvendit të ri në shtator, Drejtoria e Përgjithshme e Gjendjes Civile si pjesë e Ministrisë së Brendshme, ka mundësinë që të propozojë një amnisti të dytë apo shtyrje të ekzistueses, veprim i cili do t’i jepte një shans të ri atyre që nuk kanë përfituar akoma e do të shmangte penalitetin e gjobës në vlerë 10 mijë lekë, raporton portali SCAN.
Afrimi i përfundimit të afatit për dekarimit falas të vendbanimit ka sjellë një fluks të madh qytetarësh në zyrat e gjendjes civile në Tiranë e në rrethe.
Duke nisur nga dita e nesërme, pasi ka përfunduar periudha 6-mujore e amnistisë, për çdo mosdeklarim të ndryshimit të vendbanimit, DPGJC ka njoftuar se nga shërbimi i Gjendjes Civile, zyrat e Gjendjes Civile në bashki dhe në njësi administrative, do të aplikojnë masën e gjobës prej 10. 000 (dhjetë mijë) lekësh.
k.k/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.