A po përgatiten kompanitë në Britani për një ‘hard Brexit’?
Rreth 80% e firmave të vogla të Britanisë nuk janë të përgatitur për një divorc shkatërrues të Britanisë nga BE në tetor, sipas Konfederatës së Industrisë Britanike. Ndërmarrjet e vogla dhe të mesme punësojnë rreth 16.3 milion njerëz në Mbretërinë e Bashkuar, ose 60% të personelit të sektorit privat, dhe gjenerojnë 2 trilion paund në të ardhurat vjetore, tregojnë shifrat e qeverisë. Mungesa e përgatitjes së tyre e lë Britaninë të çarmatosur ndaj një krize të rëndë ekonomike.
Në një ndryshim të dukshëm nga paraardhësja Theresa May, Boris Johnson po përshpejton përpjekjet për të përgatitur kombin për të dalë nga BE pa një marrëveshje të negociuar. Ai po dyfishon shpenzimet për gatishmërinë mbi ‘hard Brexit’, duke përfshirë operacione të reja kufitare dhe doganore, dhe duke planifikuar një fushatë të komunikimit publik. Johnson është zotuar të largohet nga BE më 31 tetor me çdo kusht.
Dështimi për të gjetur një kompromis me BE do ta shtyjë Britaninë në kurs që të dalë nga blloku pa ndonjë marrëveshje për të siguruar tregti të qetë ndërkufitare dhe tregje të rregulluara. Kjo mund të shkaktojë vonesa në porte, mungesë të furnizimeve thelbësore, përfshirë ilaçet dhe një recesion në ekonomi.
Për të qenë të sigurt, firmat e mëdha, si Airbus SE dhe Tesco Plc, kanë kohë që përgatiten për çdo lloj skenari të mundshëm mbi Brexit. Megjithatë, përgatitja e dobët nga bizneset e vogla mund të prishë ato më të mëdha duke bllokuar zinxhirët e furnizimit. Për disa, planifikimi mbi skenarët e mundshëm të Brexit është thjesht shumë i kushtueshëm. Buttermilk, një prodhues ëmbëlsirash në perëndim të Anglisë, ka vendosur kundër investimit në makineri prodhuese që importon nga Italia dhe Danimarka, sepse shpenzimet janë shumë të mëdha. Çdo biznes që importon lëndë të parë nga ndonjë vend i BE-së është në rrezik nëse Brexit ndodh pa ndonjë marrëveshje, për shkak se tregjet do të bëhen shumë kaotike.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.