Abuzime me fondet dhe punësimet – Raporti/ Institucionet kyçe bëjnë “pazare” në shkelje të ligjit
Institutionet me buxhetet më të mëdha kanë pasur performancë të dobët gjatë vitit 2019 për shkak të të ndryshimit të shpeshtë të strukturave dhe të stafit, mos zbatimin e procedurave ligjore, mos përditësimin e rregulloreve, mos identifikimin e risqeve apo parregullësive në menaxhimin e aseteve publike. Sipas raportit të auditimit të publikuar nga Ministria e Financave dhe të zbardhur nga TV SCAN, në këto institucione kyçe, si Drejtoria e Përgjithshme e Doganave, Tatimeve, AKU-ja, Agjencia për Zhvillim Bujqësor dhe Rural, Shërbimi Kombetar i Punësimit, QSUT, Drejtoria e Përgjithshme e Burgjeve, Spitali Universitar i Traumës, Agjencia e Trajtimit të Pronave, Autoriteti Rrugor Shqiptar, Drejtoria e Përgjithshme e Policisë së Shtetit, Garda e Republikës, Agjencia Kombëtare e Ujësjellës Kanalizime, Instituti i Sigurimeve Shoqërore, etj, në sistemin e menaxhimit të burimeve njerëzore janë gjetur mospërputhje të kërkesave të vendit të punës me aftësitë dhe eksperiencën e stafit;
Lëvizjet e shpeshta të stafit dhe mos plotësimin në kohë të vendeve vakante; Mos zbatimin e procedurave lidhur me punësimin, lëvizjen dhe largimin e stafit. Ndërsa sa takon sistemit të prokurimeve evidentohen gjetje si : mos respektim i rregullave për argumentimin dhe dokumentimin qartësisht të llogaritjes së fondit limit; Përcaktim të e fondeve në kundërshtim me procedurat e miratuara; Realizim të procedurave të prokurimit në kundërshtim me ligjet dhe aktet nenligjore; si dhe pagesën e kontratave/faturave tatimore pa u realizuar punimet, kryer shërbimi, apo në kundërshtim me kontratën e firmosur.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.