Abuzimet me pronat në jug, KLSH: Ndërtime pranë brigjeve, akte pronësie të lëshuara nga organe të paidentifikueshme
Legalizime në zona të ndaluara, pa ruajtur distancën nga bregu I detit apo rrugëve, deri AMTP të lëshuara nga institucione të paidentifikueshme. Auditimi i kryer nga Kontrolli I Lartë I Shtetit në kadastrën e Sarandës, ish zyra e regjistrimit të pasurive dhe agjencinë e legalizimeve të këtij qarku zbardh një seri të gjatë shkeljesh, mes të cilave bin në sy se janë janë pranuar dokumente njohje pronësie në një çast kur nuk mund të identifikohet organi shtetëror që ka lëshuar dokumentin.
“Në 55 raste, u konstatua se dokumentacioni për pranimin e AMTP dhe regjistrimit të tokës bujqësore të përfituar nga ligji nr. 7501, datë 19.07.1991 “Për tokën” i ndryshuar; nuk përmbante elementët e formës dhe përmbajtjes; nuk mund të identifikohet organi që e ka lëshuar dokumentin; ka AMTP të ndryshme për të njëjtën pasuri; përpilimi i dokumentacionit për regjistrimin e akteve të marrjes së tokës në pronësi dhe plan vendosjen e pronave është bërë pa dokumentin certifikatë e gjendjes”, thekson Kontrolli I Lartë I Shtetit në raportin me të dhënat e audituesve.
Më tej KLSH konkludon se në 6 raste, për lejet e legalizimit, është kryer legalizimi i objektit informal të ndërtuar pa respektuar distancat nga brigjet; Në 23 raste, sipas dokumentacionit të pronësisë lëshuar nga ZVRPP, parcela ndërtimore e zënë ndodhet e regjistruar në pasurinë e llojit “Arë, Pyll, P.F”. Pra legalizimi është kryer në zona “Territore të tjera”, në kundërshtim me legjislacionin në fuqi.
Në 8 raste, sipas dokumentacionit disponibël në dosje, si vetëdeklarimi (i regjistruar edhe në faqen zyrtare të ALUIZNI-t) fotografitë e objektit si dhe imazhet satelitore konstatohet se objektet informale të vetëdeklaruara janë ndërtuar jashtë afatit ligjor, thekson në raportin përfundimtar të auditimit Kontrolli i Lartë i Shtetit.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.