Abuzimi me referencat – “Doganat kërkime sipërfaqësore, nuk zbatojnë një standard”
Referencat duket të jenë një nga shqetësimet kryesore të bizneseve importuese të cilat raportojnë se nga ana e Drejtorisë së Përgjithshme të Doganave, kur nuk njihet vlera e transaksionit, kalohet direkt tek referenca pa bërë kërkimet e tjera të nevojshme.
Referuar dokumentit zyrtar të Këshillit të Investimeve thuhet se:
“Bizneset e kontaktuara shprehen se në rastet kur administrata doganore nuk njeh vlerën e transaksionit, kalohet menjëherë tek çmimet e referencës, pa u argumentuar arritja e këtij përfundimi. Autoriteti doganor vendos çmimet e referencës edhe kur operatori ekonomik depoziton dokumentacionin që shoqëron çmimin e paraqitur në doganë (invoice, kontrate, swift payment) dhe argumentat përkatëse”.
Sipas biznesit, autoritetet doganore nuk shterojnë të gjitha mënyrat e kërkimit të informacionit duke zgjedhur mënyrën e thjeshtë.
Por edhe kur aplikohet referenca duket se ka një ngërç që lidhet me lajmërimin e operatorit ekonomik. Mosnjoftimi e privon këtë operator nga mbrojtja që duhet të bëjë në fazën e rivlerësimit duke rezultuar në një proces jotransparent.
Por sikur të mos mjaftonin këto probleme duket se mungon një unifikim i praktikave në pika të ndryshme doganore.
“Në të paktën 2 raste të raportuara në Sekretariat, janë evidentuar praktika të ndryshme të vlerësimit doganor për të njëjtin mall, nga njëra degë doganore në tjetrën”, thuhet në raport.
Gjetjet vijnë në kuadër të diskutimit të fundit të Këshillit të Investimeve për lehtësimin e procedurave doganore.
Nertila Maho/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.