Administrata planifikim të dobët për investimet, KLSH: “U rishikuan shpenzimet për 1169 projekte, ndryshim fondesh prej 40 milionë dollarësh”

Rishikimi i fondeve buxhetore për shkak të hartimit të pasaktë të projekteve të investimeve është një shqetësim që vërehet vit pas viti në institucionet publike. Kontrolli i Lartë i Shtetit ka raportuar në Kuvend se gjatë vitit të shkuar  janë miratuar një numër i lartë rishikimesh buxhetore sidomos për fonde për shpenzime për investime për rreth 1169 projekte me një ndryshim neto të fondeve disponibël prej 4.13 miliard lekë, afërisht 40 milionë dollar, fakt që flet për një planifikim të dobët të investimeve publike, moszbatim të prioriteteve dhe radhës së planifikuar për zbatim.

Krahasuar me një vit më parë, ku u rezultuan 2065 regjistrime për 1179 projekte për investime nga 1006 njësi buxhetore, duket se numri i projekteve të rishikuara dhe numri i regjistrimeve janë më të ulëta megjithatë duke mos patur siguri në saktësinë e numrit të rishpërndarjeve të evidentuara gjatë auditimit, nuk mund të konkludohet se viti 2019, ka përmirësime në lidhje me mirë planifikimin e fondeve buxhetore që në fazat planifikuese të tij. Kërkesat për rishikime vijnë nga pothuaj të gjitha njësitë ekonomike, por njësitë e qeverisjes vendore janë ato që janë në proces rishikimi dhe rishpërndarje fondesh të vazhdueshme përfshirë këtu dhe kërkesat për çelje projektesh të reja të financuara me të ardhurat e veta.

Nga të dhënat e vëna në dispozicion KLSH konstaton se rishikimet shpesh lidhen me projekte të cilat nuk kanë kaluar në të tërë hallkat e procesit të miratimit të investimeve publike dhe janë të pa miratuara në dokumentin PBA, ndërkohë disa projekte edhe pse kanë kryer procedurat e prokurimit fondet buxhetore të tyre u rishpërndahen në projekte të tjerë. Janë konstatuar raste kur rishpërndarja nuk ka qenë e domosdoshme dhe nuk është kërkuar nga njësia buxhetore asnjë rishpërndarje rrjedhimisht në fund të periudhës këto projekte figurojnë me realizim 0% dhe fondet respektive të “djegura” për vitin buxhetor të miratuar. KLSH në vazhdimësi ka theksuar se numri i lartë i rishikimeve buxhetore jo vetëm që është një tregues i një planifikimi të dobët në fazat  paraprake të hartimit dhe miratimit të projekt buxhetit dhe PBA por edhe i mungesës së monitorimit të ecurisë së investimeve.

Lorenc Rabeta / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.