Administrata Publike, shpallet procedura e pranimit në nivelet e larta drejtuese të Shërbimit Civil. Kandidatët që mund të konkurrojnë

Këshilli i Ministrave miratoi së fundmi hapjen e procedurës së pranimit të drejtpërdrejtë në Trupën e Nëpunësve Civilë të Nivelit të Lartë Drejtues (TND) edhe për kandidatë të tjerë, jashtë shërbimit civil dhe për përdorimin e procedurës së pranimit të drejtpërdrejtë në TND, për vitin 2018.

Vendimi thekson se për vitin 2018 pranimi në TND do të bëhet në mënyrë të drejtpërdrejtë, nëpërmjet një konkursi kombëtar, ndërkohë numri i pozicioneve, për të cilat do të përdoret procedura e pranimit të drejtpërdrejtë në TND, është 15.

Kriteret e pranimit

Kriteret minimale të pranimit për këtë procedurë, për kandidatët nga jashtë shërbimit civil, janë:

a) Të plotësojnë kushtet e përgjithshme të pranimit në shërbimin civil, të përcaktuara në ligjin nr.152/2013.

b) të zotërojnë një diplomë të nivelit “Master shkencor” ose të barasvlefshme me të, sipas legjislacionit të arsimit të lartë. Diplomat, të cilat janë marrë jashtë vendit, duhet të jenë njohura paraprakisht pranë institucionit përgjegjës për njësimin e diplomave, sipas legjislacionit në fuqi.

c) të kenë, të paktën, 3 (tre) vjet përvojë pune në pozicione të mesme drejtuese ose të barasvlefshme, në:

– Institucione të administratës publike;

-Institucionet bankare të nivelit të dytë dhe që, aktualisht, nuk kanë detyrime ndaj shtetit ose nuk janë në proces kundër tij;

-Shoqëri tregtare, të cilat, sipas legjislacionit në fuqi, konsiderohen si biznes i madh dhe që, aktualisht, nuk kanë detyrime ndaj shtetit ose nuk janë në proces kundër tij;

-Organizatat jofitimprurëse, të cilat kanë, të paktën, 5 vite që janë krijuar.

Përjashtimisht, kandidatët nga jashtë shërbimit civil, të cilët kanë punuar dhe/ose punojnë:

-Në institucione ndërkombëtare brenda vendit;

-Në profesion jashtë vendit;

-Pedagogë në institucione të arsimit të lartë;

-Avokatë, noterë apo kontabilistë të miratuar, brenda ose jashtë vendit,

-Duhet të kenë, të paktën, 5 vite përvojë pune, përkatësisht në këto institucione ose në profesion.

ç)  të mos kenë procese gjyqësore, civile, penale, administrative të cilat janë në proces, si edhe të mos jenë në ndjekje penale nga prokuroria.

Ngarkohet Departamenti i Administratës Publike për ndjekjen dhe zbatimin e këtij vendimi, i cili pritet të hyjë në fuqi me botimin në “Fletoren Zyrtare”.

os.de/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.