Aeroporti i Kukësit – Vetëm një ofertë për 8 milionë euro
Këtë javë u mbyll afati për dorëzimin e ofertave për dhënien me koncesion të aeroportit të Kukësit.
Ministria e Infrastrukturës njofton se në garë është paraqitur vetëm një ofertë, nga bashkimi i përkohshëm i shoqërive Global Technical Mechanics dhe Bami. Në marrëveshjen e bashkëpunimit midis tyre është përcaktuar se 30% e punimeve, do të kryhen nga Global Technical Mechanics shpk dhe 70 % nga Bami shpk.
Një nga kriteret kualifikuese të kësaj procedure ishte pjesëmarrja e një shoqërie me përvojë në fushën e operimit dhe menaxhimit të aeroporteve e pajisur me licencat përkatëse lëshuar nga autoritetet ndërkombëtare të aviacionit, nëpërmjet një kontrate me operatorin ekonomik. Në dokumentet e dorëzuara nga konsorciumi që ka paraqitur ofertë në këtë procedurë gare është përfshirë dhe marrëveshja mes konsorciumit dhe kompanisë holandeze NACO me eksperiencë në fushën e menaxhimit dhe administrimit të aeroporteve.
Oferta financiare e paraqitur nga dy shoqëritë është afërsisht 8 milionë euro, pa TVSH. Pas përfundimit të procesit të shqyrtimit të dokumentacionit, Ministria e Infrastrukturës dhe Energjisë do të informojë në lidhje me vendimmarrjet e mëtejshme të komisionit në këtë procedurë konkurruese.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.