Aeroporti i Vlorës, kryeministri: Negociata të vështira për kontratën po puna nis vitin e ardhshëm! Rrugë e re e Tunel në Llogara
Punimet për ndërtimin e Aeroportit të Vlorës do të nisin vitin e ardhshëm. Të paktën këtë deklaroi kryeministri në takimin me banorë në Vlorë ku prezantoi projektbuxhetin e vitit të ardhshëm. Kryeministri pranoi se ka pasur një negociatë të vështirë për të finalizuar kontratën e megjithatë ai u shpreh i sigurtë për vijimin e punimeve që parashikohet të finalizohen deri në vitin 2021.
“Kemi pasur një negociatë të vështirë për të finalizuar kontratën për aeroportin e Vlorës, por, siç u tha këtu, unë e përsëris, në të gjitha rastet, vitin e ardhshëm do të fillojmë ndërtimin e Aeroportit të Vlorës. Tani, po pati mundësi, mos filloni që nesër të më shkruani në facebook, “pse nuk e fillove aeroportin mbrëmë”. Vitin e ardhshëm, se kur vitin e ardhshëm, këtë nuk jemi në gjendje ta themi sot, por brenda këtij mandati, ne do ta bëjmë Vlorën me aeroport, pa diskutim” tha kryeministri.
Tuneli i Llogorasë
Një projekt tjetër që përmendi në fjalimin e tij kryeministri ishte edhe ai për rrugën e re Orikum-Llogora që parashikon gjithashtu një tunel.
“Për mua është shumë e rëndësishme që do të fillojmë rrugën Orikum-Llogara dhe ministri duhet të mbajë zotimin për tunelin. Tuneli i Llogarasë ka të paktën 30 vjet, në mos gabohem, që premtohet. Është hapur si temë që kur ndodhi ai aksidenti i tmerrshëm pas shkarjes së autobusit të studentëve dhe pastaj dy helikopterë që u përplasën, duke marrë jetën e mbi 20 të rinjve e mjekëve dhe është koha që tunelin ta bëjmë realitet!
Nga ana tjetër, do të nisim shumë shpejt vazhdimin e Lungomares deri tek tuneli i Ujit të Ftohtë dhe njëkohësisht edhe rindërtimin e të gjithë aksit nga Uji i Ftohtë, në Radhimë dhe në Orikum, ku do të bëhet bashkimi me rrugën e re Orikum-Llogara dhe pastaj tuneli për të shkuar në anën tjetër. Është shumë themelore që të transformohet e gjithë ajo zonë, nga pikëpamja e infrastrukturës!
Projekti parashikon një spostim për disa kilometra të rrugës ekzistuese, e cila, si rrugë ekzistuese sot që është pranë detit do të kthehet në një rrugë këmbësore. Ndërkohë që, trafiku do të spostohet në një linjë paralele pak më tutje, për ta transformuar të gjithë atë zonë, nga një zonë që është dhe turistike, edhe zonë kalimi, në një zonë mirëfilli turistike” tha kryeministri.
Heqja e kioskave
Një projekt tjetër i përmendur në takimin e mbajtur në Vlorë ishte ai i heqjes së kioskave në Skelë.
“Sheshin e Skelës që ka mbetur në mes dhe do çlirojmë nga e gjithë ajo rrëmujë kioskash e topash, Muzeun e Pavarësisë. I vetmi vend në botë, ku Shtëpia e Pavarësisë është e rrethuar nga kioska dhe ku byrektorja shkon deri tek muri i Shtëpisë së Pavarësisë!
Po bëjmë projektin me Bashkinë dhe do bëjmë një investim aty, për të krijuar një pikë të re zhvillimi urban të qytetit. Ashtu sikundër, sot ne vizituam edhe kantierin e qendrës historike. Nuk e di a ju ka rënë rruga, por qendra historike ka filluar të dalë pak nga pak në dritë edhe do jetë një pikë e re referimi për këtë qytet” vijoi kryeministri.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.