Afati i paktit të OPEC – Arabia Saudite pret që ulja e prodhimit të ndalojë në 2019-ën
Organizata e Vendeve Eksportuese të Naftës dhe aleatët përfshirë Rusinë, mund të braktisin paktin e uljes së prodhimit në vitin e ardhshëm, pakt që ka mbështetur rritjen e çmimeve nga kriza më e keqe e kësaj gjenerate.
Sipas ministrit të naftës së Arabisë Saudite, Khalid Al-Falih, ndërkohë që tregu po shkon drejt ekuilibrit dhe inventarët po tkurren, hap i radhës për prodhuesit global do të jetë ndalimi i reduktimeve.
Sipas tij, reduktimi i prodhimit mund të ndalojë nga viti 2019, por nuk dha një kohë ekzakte. Marrëveshja mes OPEC dhe vendeve partnere që synon tkurrjen e tepricës globale nisi në vitin 2017 dhe e ka afatin deri në fund të këtij viti.
Ndërkohë që prodhimi në SHBA ka arritur majat, janë shtuar edhe spekulimet mbi zgjatjen e paktit nga karteli.
Ministri i naftës në Arabinë Saudite e mirëpriti rritjen e prodhimit në SHBA, duke thënë se kërkesa pritet të qëndrojë e fortë në 2018-ën dhe tregu do të ketë mundësinë që ta absorbojë këtë ofertë.
Ndërsa vendet e përfshira në uljet e prodhimit po konsiderojnë mënyrat për të zgjatur partneritetin e tyre në vitet e ardhshme, kufizimi i prodhimit mund të përbëjë një sfidë.
Kompanitë ruse të naftës, që janë të gatshme të vazhdojnë projektet e tyre të reja, kanë bërë thirrje për një përfundim gradual të këtij pakti.
Vende të tjera të OPEC si Iraku, Irani dhe Libia, kërkojnë që të zgjerojnë kapacitetin e tyre pas humbjeve në të ardhura si pasojë e sanksioneve.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.