Afrojnë lojërat Olimpike në Tokjo / Caktohen qendra të vaksinimit për të imunizuar të rinjtë

Një qendër gjigante e vaksinimit në Tokjo do të nisë regjistrimin e njerëzve nën 65-vjeç për të marrë vaksina të Covid-19 nga dita e Shtunë, sipas mediave lokale, ndërkohë që Japonia shton përpjekjet e imunizimit përpara nisjes së Lojërave Olimpike në muajin e ardhshëm. Japonia nisi vaksinimin e punëtorëve të shëndetësisë dhe të moshuarve në muajin Shkurt, por ritmi i ngadaltë i imunizimit krahasuar me vende të tjera të industrializuara, ka nxitur thirrje për anulimin e Lojërave në Tokjo përsëri. Shumë japonezë shqetësohen se vendi është i papërgatitur për të mbajtur dhjetëra mijëra atletë të huaj dhe zyrtarë të lojërave olimpike,  ndërkohë që sistemi shëndetësor po has vështirësi me një valë të katërt të infeksioneve.  Qendra e vaksinimit në Tokjo do të nisë gjithashtu të caktojë orare përmes telefonit për të parën herë, përveç porosive online, në përpjekje për të inkurajuar më shumë njerëz që të vaksinohen.   Kryeministri Yoshihide Suga tha këtë Javë se Japonia synon të përfundojë vaksinimin e të gjithë qytetarëve që kërkojnë vaksina deri në Nëntor, çka kërkon rreth 1 milionë injeksione në ditë.  Me vetëm 50 ditë përpara lojërave Olimpike, Japonia ka vaksinuar vetëm 1/10 e popullsisë me të paktën 1 dozë. Organizuesit këtë muaj do të vendosin nëse do lejojnë njerëzit në Japoni të marrin pjesë në event, pasi ndaluan më herët spektatorët e huaj.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.