Afron Gushti për Greqinë – Pritet mbyllja e kapitullit të vështirë për vendin dhe gjithë Eurozonën
Ministri i Financave në Luksemburg, Pierre Gramegna, tha se dalja e Greqisë nga programi i shpëtimit, e drejtuar nga Eurozona dhe Fondi Monetar Ndërkombëtar, pritet të përfundojë me sukses në Gusht. Ai përbën një nga 19 ministrat e Eurozonës, që do të takohen muajin e ardhshëm për të vendosur mbi lehtësimin e borxhit për Greqinë pas muajit Gusht.
Plani mund të mbyllë një kapitull të vështirë në historinë e Eurozonës, që në faza të ndryshme ka kërcënuar të ardhmen e projektit të euros. Gjatë një takimi të Bankës Europiane për Rindërtim dhe Zhvillim, ministri tha se Greqia ka përmbushur të gjithë kërkesat e kreditorëve, nëpërmjet reformave të ndërmarra në vitet e fundit. “Ekonomia po rritet në mënyrë të qëndrueshme dhe suficiti primar në buxhetin grek është sipër projeksionit më optimist. Ky kapitull i vështirë për Greqinë dhe Eurozonën pritet të përfundojë”, tha ai.
Sipas Eurogrupit, lehtësimi i borxhit duhet të përdoret si incentivë për Athinën, në mënyrë që rimëkëmbja ekonomike të vazhdojë. Ministri i Financave në Luksemburg shtoi se Eurozona po përpiqet të krijojë gjithashtu një serë masash për të fuqizuar sistemin e mbrojtjes ndaj krizave në samitin e Qershorit. Një ndër këto është fuqizimi i rolit të Mekanizmit Europian të Stabilitetit dhe fondit të shpëtimit të bankave (SRM).
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.