Aftësia për të gjeneruar para’ – Të 53-tët në botë, kemi kapital, nuk kemi manaxhim
Shqipëria është e 53-ta në botë, ndër 180 ekonomi në drejtim të aftësisë për të gjeneruar të ardhura për popullatën. Renditja përkthehet në një përmirësim me plot 23 pozicione në krahasim me raportin e vitit të kaluar, kur renditej e 76-ta.
Raporti është publikuar së fundmi dhe rezultati është jo pak surprizues. Indeksi GCSI, pra indeksi global i konkurrueshmërisë së qëndrueshme, mat aftësinë e shteteve sot, por edhe në të ardhmen, për të gjeneruar dhe mbështetur të ardhurat dhe pasurinë financiare si dhe jo financiare për popullatën e tyre. Për të përpiluar indeksin e përgjithshëm në konsideratë merren plot 5 shtylla kryesore: kapitali natyror, ai social, menaxhimi i burimeve, kapitali intelektual dhe efiçenca e qeverisë.
Në krahasim me vendet e tjera të rajonit, Shqipëria është më keq vetëm se Serbia, e renditur e 50-ta, ndërkohë që le pas të gjitha vendet e tjera.
Renditja e Shqipërisë sipas 5 nën-indikatorëve ndërkohë paraqet një situatë mjaft interesante. Në drejtim të kapitalit, pra asaj që ka shoqëria, Shqipëria performon bindshëm më mirë, sesa në dy indikatorët që i referohen menaxhimit të këtij kapitali, pra efekti qeveri. Në nën-indikatorin e kapitalit natyror, Shqipëria renditet e 77-ta në botë, në atë social e 45-ta dhe po e 45-ta në atë intelektual.
Ndërkohë, ana tjetër e medaljes, tregon se, në atë të efektshmërisë së qeverisë, Shqipëria renditet e 76-ta, dhe në atë të menaxhimit të burimeve, e 121-ta.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.