Aftësitë në punë, jemi më mirë se rajoni – Raporti i BB dhe Wiiw: “Punë ka, por s`ka profesionistë” vlen më pak në Shqipëri
“Punë ka, por s`ka profesionistë” është një shprehje që ka shoqëruar vazhdimisht jo vetëm justifikimet e qeverisë gjatë viteve të fundit për problemet e tregut të punës, por edhe ankesat e sipërmarrjes. Raporti më i fundit i Institutit të Vienës për Studime Ekonomike Ndërkombëtare (Wiiw) dhe Bankës Botërore për tendencat e punësimit në rajon, tregon se, po, problematika ekziston, e madje është e thellë, por jo aq sa në vendet e tjera të rajonit.
Sipas raportit, vendet e tjera të rajonit e kanë këtë problematikë shumë më të theksuar se ne. Në Shqipëri, rreth 55% e firmave deklarojnë vështirësi në punësim si pasojë e mungesës së aftësive dhe eksperiencës, dhe rreth 50% vetëm si pasojë e mungesës së aftësive. Për vendet e tjera të rajonit, norma ngjitet mbi 60%, e thuajse në 90% në rastin e Maqedonisë së Veriut. Të dhënat tregojnë se për kompanitë e mëdha, me më shumë se 100 punonjës, problemi bëhet edhe më i madh, si edhe në sipërmarrjet inovative.
E njëjta gjë vlen edhe për kompanitë e huaja që operojnë në vend. Sipas raportit, kjo problematikë është rrjedhojë e drejtpërdrejtë e sistemi arsimor jo efikas. Vlerësohet se vitet e humbura në arsim në Shqipëri, si pasojë e mungesës së efikasitetit janë diçka më shumë se 2 vite. Kjo kohëzgjatje është ndjeshëm më e lartë se në vendet e Europës Perëndimore, por më e vogël se vendet e rajonit.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.