Agjencia Kombëtare e Titujve të Pronësisë, çfarë sjell struktura e re që u njoftua në planin e 100 ditëshit?

Qeveria e re ka paralajmëruar projektin për të reduktuar numrin e drejtorive të rëndësishme përmes shkrirjes së agjencive që kanë objekt pune të përbashkët. Dy nga ndryshimet e paralajmëruara ishin bashkimi i institucioneve të pronave(Hipoteka-Legalizime-Agjencia e Pronave) dhe bashkimi i institucioneve të të ardhurave (tatime-dogana).

Ndryshe nga kjo e dyta, që gjetur rezerva në radhët e FMN-së të cilat janë publikuar në raportin e fundit, për të parën duket se procesi do të nisë brenda 3 muajve apo 100 ditëve.

Bashkimi i Agjencisë së Legalizimeve, Agjencisë së Trajtimit të Pronave dhe Hipotekave u paralajmëruar si një ndër proceset që do të nisë brenda 100 ditëv të para, raporton portali “SCAN”.

Në fjalimin e mbajtur në Asamble, kryeministri Edi Rama tha se reforma ka nisur dhe se brenda 100 ditësh do të bëhet publik programi për krijimin e Agjencisë Kombëtare të Titujve të Pronësisë.

“Hipotekat. Ato janë një tjetër llum i madh. Dhe aty reforma ka nisur. Brenda 100 ditësh do të lançojmë të gjithë programin për krijimin e Agjencisë Kombëtare të Titujve të Pronësisë dhe transformimi përfundimtar të këtij sektori, po e quajmë nga një llum në një zonë shërbimesh transparente dhe të shpejta për qytetarët” tha Rama.

Krahas tre institucioneve të rëndësishme, në agjencinë e re pritet të integrohet edhe Agjencia e Inventarizimit të Pronave, që ka varësi nga Ministria e Brendshme.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.