Agjencitë Private të Punësimit, qeveria miraton kushtet – Shërbimet, falas për punëkërkuesit. Bashkëpunim me zyrat shtetërore
Këshilli i Ministrave ka miratuar në mbledhjen e radhës, mënyrën e organizimit dhe të funksionimit të Agjencive Private të Punësimit. Në vendim përcaktohet se këto agjenci kryejnë këto shërbime:
- Informimin, këshillimin, si dhe vlerësimin e kërkesave e aplikimeve për ndërmjetësim për punësim
- Kërkimin e vendeve të punës
- Ndërmjetësimin për përcaktimin e kushteve dhe të lidhjeve të marrëdhënieve të punës mes palëve
Vendimi përcakton qartë se shërbimet për punëkërkuesit do të jepen falas dhe do të përballohen nga punëdhënësit, me përjashtim të pagesës për plotësimin e dosjes administrative të punëkërkuesit.
Për të ushtruar aktivitetin, këto biznese duhet të pajisen me licencën e kategorisë X.2.A “Ndërmjetësim në tregun e punës”. Ato mund të punësojnë edhe shtetasit shqiptarë jashtë shtetit, për sa kohë që zbatojnë marrëveshjet dypalëshe në fuqi me vendet përkatëse.
Licenca revokohet në rastet kur pronari apo ortaku i agjencisë ka qenë i dënuar më parë për vepra penale të kryera me dashje, bën reklamime të rreme, nxjerr dëshmi të rreme, përdor dokumentet të falsifikuara, kërkon tarifa nga punëkërkuesi, ofron shërbime edhe për të miturit, ndikon në mospunësim, pengon punën e organeve të inspektimit, apo nuk paguan sigurimet shoqërore për të punësuarit.
Gjithashtu, personeli i agjencisë duhet të ketë kualifikimin dhe trajnimin e nevojshëm për shërbimin e ofruar.
Një dispozitë e rëndësishme e VKM thotë se agjencitë duhet të bashkëpunojnë në lidhje me shkëmbimin e të dhënave dhe njoftimin e vendeve të lira të punës me zyrat shtetërore të punësimit.
Specifikohet po ashtu se agjencia duhet të ruajë konfidencialitetin e punëkërkuesit dhe nuk ka të drejtë të ruajë të dhënat e dosjes nëse nuk justifikohet qëllimi, me përjashtim të rasteve kur personi jep pëlqimin që të qëndrojë në regjistrin e agjencisë.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.