Agron Duka në “Argument”: Bujqësia ka nevojë për subvencione direkte e për një strategji të plotë

Ish ministri i Bujqësisë, Agron Duka, aktualisht deputet e drejtues i Partisë Agrare Ambientaliste evidenton nevojën që vendi ka për një strategji të mirëfilltë për zhvillimin e bujqësisë në vend. I ftuar në emisionin “Argument” të gazetarit Enio Civici, Duka tha se deri më tani vendit i kanë munguar strategjitë e plota e ato që janë propozuar deri më tani kanë qenë të njaanshme e si rrjedhojë nuk kanë gjetur zbatim të plotë.

“Këto gjysmëstrategjitë apo strategjitë e ndjekura vetëm nga një kah i politikës kur është në pushtet dhe i braktisur nga krah tjetër, janë negative. Përplasja e kaheve politike është shumë e dëmshme e ndaj duhet, që kur të përcaktohet një strategji e caktuar, mendimi të mos jetë vetëm i politikës por i specialistëve të bujqësisë. Subvencioni për ullinjtë apo arrorët p.sh, mirë apo keq, e rëndësishme ishte që të vendosej nga specialistët e jo vetëm nga politika;  të mbështetej nga politika. Por, të lihet përgjysmë e të kalohet në një metodë tjetër, atëhere kjo është gjysmë strategji. Një strategji nuk bëhet për 4-5 vite por për një kohë më të gjatë. Nëse zëri i specialistëve dëgjohet, janë ata që i japin tonet zhvillimit të bujqësisë e atëhere janë të qendrueshme e efektive” u shpreh Duka.

Duka e konsideroi të pamjaftueshme mbështetjen e deritanishme buxhetore për bujqësisë, që mbetet një nga sektorët që i jep më shumë Prodhimit të Përgjithshëm Kombëtar. Sipas Dukës, duhet që buxheti për bujqësinë të jetë minimalisht 5 përqind.

“Bujqësia ta shpërblen. Ne marrim afro 20 përqind ndërkohë që ne i japim 2 përqind. Nga ajo që marrim japim shumë pak. Unë ngul këmbë që shihet si gjysëm prioritet dhe si gjysëm-strategji. Duhet të konsiderohet si prioritet i plotë e si një strategji e plotë. Ky është sektori më i rëndësishëm i ekonomisë. Dikur ka qenë ndërtimi ndër sektorët e parë që jepte kontribut në GDP, ndërsa sot situata është ndryshe e ndaj duhet t’i kemi sytë nga bujqësia e agroturizmi” vijoi Duka.

Sa i përket mënyrës së mbështetjes së fermerëve, Duka tha se duhet subvencionuar prodhimi direkt. Ndërsa sa i përket kreditimit përmes fondit të garancisë shtetërore, kreu i PAA tha se kjo mund të shërbejë për të mbështetur segmente të sektorit bujqësor. E sa i përket sigurimit të fermerëve, kreu i agrarëve tha se nevojitet që shteti të marrë një rol më të madh në këtë proces për faktin se kostot janë të papërballueshme për fermerët.

Ndërkohë, Duka komentoi edhe situatën politike ku evidentoi se opozita është në protestë për garantimin e zgjedhjeve të lira e të ndershme. E sa i përket zgjedheve të ardhshme, Duka bëri të ditur se forca e tij do të kandidojë profesionistë të fushës së bujqësisë, mjedisit e zhvillimit rural. Në këtë kontekst, Duka bëri të ditur se forca e tij do të kandidojë në Berat me ambientalistin e njohur Sazan Guri.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.