Agroturizmi, ja kriteret për marrjen e certifikatës – Programi për nxitësit fiskal miratohet në javët në vijim
Qeveria ka vendosur të shfrytëzojë potencialin e agroturizmit, si një mundësi e mirë për të nxitur zhvillimin e zonave rurale dhe fermave e bizneseve në këto zona. Pas përfundimit të mbledhjes së Këshillit të Ministrave në Lezhë, Rama deklaroi se subjektet që do të klasifikohen si agroturizëm do të pajisen me një certifikatë, e cila do t’u mundësojë atyre lehtësi fiskale dhe stimuluese.
Teksa programi i nxitësve fiskalë është ende duke u hartuar, pritet të ofrohen lehtësi të ngjashme me ato të akorduara për strukturat akomoduese, të cilat tashmë paguajnë vetëm 6% TVSH, por edhe do të mund të përfitojnë mbështetje financiare nga programe të ndryshme, si ai i zhvillimit rural për 100 fshatra.
Subjektet që duan të marrin këtë certifikatë duhet të ofrojnë minimalisht njërin prej shërbimeve të mëposhtëm:
- Akomodim (6-30 dhoma) ose (15 makina fushimi)
- Ushqim dhe pije (6-60 tavolina) (30% nga ferma. Deri në 70% nga zona përreth)
- Veprimtarie argëtuese, të lidhura me fermën ose mjedisin përreth (të ofrojnë aktivitete brenda ose jashtë fermës)
Gjithashtu ka edhe një sërë kriteresh që duhen përmbushur. Në veprimtaritë e vendosura në ferma, kur janë ferma bujqësore ato duhet të kenë të paktën 1 hektar tokë të mbjellë, ose të paktën 0.5 hektarë sera.
Në rastin e fermave blegtorale, ato duhet të mbarështojnë të paktën 10 krerë gjedh, ose 100 krerë dele/dhi, apo 200 krerë shpendë
Për këtë formë biznesi kualifikohen edhe fermat e peshkimit, pra akuakultura, si edhe njësitë agrikulturore që kanë aktivitet përpunimin e produkteve, psh: kantina të përpunimit të rrushit, baxho, pika të përpunimit të vajit të ullirit, etj.
Për marrjen e certifikatës “subjekt i certifikuar agroturizmi”, subjektet duhet të paguajnë një tarifë prej 500 lekësh, ndërsa certifikata do të jetë e vlefshme për një periudhë 5-vjeçare.
Vendimi i Këshillit të Ministrave gjithashtu detyron subjektet që e përdorin aktualisht në emërtimin tregtar fjalën agroturizëm, të aplikojnë brenda 6 muajsh për marrjen e kësaj certifikate.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.