Ai momenti kur u përplasën teknologjia dhe ushqimet

Industria e ushqimeve të qejfit si patatinat, çokollatat, kokoshkat, etj., është e gjithëditur edhe në psikologji. Për të qenë të suksesshme, një markë duhet të dijë se si të kënaqë jo vetëm urinë, por edhe nevojat tona emocionale.

Markat “snack”-eve kanë ditur historikisht të pozicionojnë produktet e tyre për të qenë pranë gjendjeve tona emocionale si: lodhja, komforti, mërzia dhe dhimbja. Por këto momente po bëhen gjithmonë e më të “zhurmshme”. Zgjedhjet në ushqime dhe konsumi i tyre po ndryshon, sfiduar nga një ndjenjë në rritje për të konsumuar shëndetshëm, por edhe krejt papritur nga teknologjia.

Nëse dikur uleshim përpara televizorit me një tas me kokoshka përpara, apo hanim një gotë të madhe me akullore pas një dite të keq, sot gjasat janë që t’i kthehemi celularit.

Varësia jonë ndaj teknologjisë tani duket se plotëson nevojat tona psikologjike. Duart që janë të zëna duke shkruar mesazhe tashmë nuk shkojnë më drejt ëmbëlsirave tona të preferuara.

Çastet kur zhyteshim në mendime po zëvendësohen gjithnjë e më tepër nga mediat sociale. Në nivel global, ne shpenzojmë mesatarisht 4.4 orë nga koha jonë e lirë duke përdorur kompjuterin, laptopin apo celularin.

Argëtimi pasiv në televizor është zëvendësuar nga një angazhim aktiv në aplikacione të panumërta në ekrane të shumtë dhe kjo po përbën një sfidë për prodhuesit e ushqimeve të qejfit. Si mund të plotësojnë ata nevojat tona për ëmbëlsira në këtë kontekst të ri të teknologjisë?

Ka ardhur koha që markat e “snack”-ëve të rimendojnë mënyrën se si të ndërveprojnë me një shoqëri të orientuar tek të shëndetshmet.

1. Të bësh zhurmë

Shumë kompani i janë drejtuar shijeve të papritura, më të forta, më të ëmbla, më të kripura, më të hidhura, më të athëta dhe më të çuditshme për të dalluar nga turma e produkteve të tjera tradicionale, që ofrojnë shije me të cilat jemi mësuar.

Një gamë e re shijesh po lind për gjëndrat shqisore më aventuriere të konsumatorëve. Trendi botëror përbëhet nga risia e shijeve si çokollatë pikante, fruta edhe më ekzotike e të padëgjuara.

Një firmë patatinash në SHBA ka ngritur disa stacione autobusi për të targetuar udhëtarët e uritur, të cilët janë shumë të zënë me celularin. Edhe firma tradicionale si Oreo janë detyruar të ofrojnë biskota me shije të reja si ëmbëlsira kërcitëse dhe gjalp kikriku.

2. Gjej momentin e duhur për inovacionin e produktit

Risia mund të përfshijë gjithçka, qoftë edhe mënyrën e paketimit apo formën e produktit. Gjithmonë e më tepër ushqime prodhohen posaçërisht në mënyrë që të ndahen me të tjerët, reklamohen si një aktivitet i përbashkët apo si diçka cool që e bëjnë të gjithë.

3. Bëhu qendra e vëmendjes

Shumë marka po ridimensionojnë qëllimin e produkteve të tyre, nga shoqëruese të një filmi, bisede, koncerti, etj., në të qenit vetë eventi kryesor. Shumë kompani që prodhojnë çokollata po bëhen të pasura duke ndërtuar dyqane ëmbëlsirash në formë kafenesh apo ekspozitash.

4. Lidhu me momentet e të sotshmes

Këto lloj ushqimesh kanë qenë gjithmonë të lidhura me periudha të ndryshme kohore gjatë ditës, si të haje një çokollatë pas palestre, të haje një patatinë në pushimin e shkollës, etj.

Por konsumatorët po humbasin gjithmonë e më tepër kohë të lirë dhe ka lindur nevoja për të krijuar momente të tjera lidhëse me ta.

Duke kuptuar se shumë udhëtarë nuk hanë mëngjes, Belvita e rrëmbeu mundësinë duke krijuar ato që ajo i quan biskota mëngjesi, duke nisur një trend që është ndjekur nga shumë kompani të tjera.

Një epokë e re aktive për të ngrënë

Rregullat për të ngrënë “snacks” kanë ndryshuar shumë: nevojat, dëshirat dhe zakonet po zhvillohen për t’iu përshtatur konsumatorëve super të ndërlidhur dhe që duan të hanë shëndetshëm. Për të rizënë pak nga hapësira e humbur, markat duhet të kuptojë ato pak gjëra specifike që i bëjnë konsumatorët të hanë një kafshatë. Ato marka që i kuptojnë më mirë marrëdhëniet tona me ushqimin, duke përdorur të dhëna të detajuara, do të rrëmbejnë momentin e tyre duke bërë zhurmë.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.