Aida Hajnaj, në krye të BKH-së. Përzgjidhet nga SPAK për të drejtuar Byronë Kombëtare të Hetimit

Aida Hajnaj është personi i përzgjedhur nga SPAK për të drejtuar Byronë Kombëtare të Hetimit. Ajo ja ka dalë të mbijetojë deri në fund të garës ndërsa 3 rivalët e saj Artur Beu, Ervin Hodaj dhe Idajet Faskaj u skualifikuan.

Në fund të garës rezulton se, Aida Hajnaj plotëson të gjitha kriteret për të drejtuar Byronë Kombëtare të Hetimit, organ që cilësohet dhe si “krahu i djathtë” i SPAK në luftën kundër krimit dhe korrupsionit, në nivel zyrtarësh dhe përfaqësuesish politikë. Emri i saj do t’i dërgohet Këshillit të Lartë të Prokurorisë për t’u votuar zyrtarisht.

Aida Hajnaj është aktualisht zv/drejtore e Policisë së Shtetit dhe pak ditë më parë në një deklaratë për shtyp, nënkryetari i PD, Edi Paloka e ka paralajmëruar emërimin e saj në krye të asaj që quhet ‘FBI’ e Shqipërisë, por duke akuzuar se kjo është një lëvizje e Ramës për të kapur edhe këtë institucion të rëndësishëm të drejtësisë.

Procesi i përzgjedhjes së kandidaturës për kreun e Byrosë Kombëtare të Hetimit është ndjekur nga afër prej përfaqësuesve të Shteteve të Bashkuara të Amerikës dhe Bashkimit Evropian.

Lorenc Rabeta / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.