AirBnb planifikon të zgjerojë gamën e shërbimeve – Sheh mundësinë e përfshirjes së transportit në platformë
Me mbi 5 milionë prona në më shumë se 80 000 qytete në mbarë botën, AirBnb në vetëm 10 vjet është rritur në mënyrë eksponenciale duke u shndërruar një nga markat më të rëndësishme në turizëm. Por, me sa duket kompania nuk ka ndërmend të ndale këtu.
AirBnb po planifikon të krijojë një platformë të re të ridimensionuar duke integruar biznese të reja, duke përfshirë edhe transportin. Edhe pse nuk ka ende informacione specifike për mënyrën se si do të vijojë zhvillimi i AirBnb-së, kjo e fundit po zhvillon diskutime nëse do të blejë një linjë ajrore ose do ta nisë këtë nga zeroja.
Me sa duket, kompania ka ndërmarrë edhe hapin e parë pasi ka bërë pjesë të stafit të saj një person me shumë eksperiencë, siç është Fred Reid, shefi i Transportit Global.
Ndërkohë, drejtori ekzekutiv i AirBnb, Brian Chesky e ka cilësuar një mundësi të jashtëzakonshme mundësinë e përfshirjes së transportit në platformë. Integrimi i transportit është vetëm një pjesë e skemës së madhe të Chesky-t, pasi AirBnb ka prezantuar edhe më herët edhe karakteristika të tilla si turne apo aktivitete të tjera.
Përpjekje ka bërë edhe në drejtim të gastronomisë, ku dy vjet më parë AirBnb u bashkua me platformën e rezervimit të restoranteve, Resy për t’u mundësuar klientëve përvojën më të mirë të mundshme.
Për momentin, sa i përket transportit, me sa duket ka akoma ‘në qoftë se’ apo ‘por’. Por, ajo që mund të themi me siguri është se AirBnb po përpiqet të riemërojë veten dhe të zgjerojë shërbimet e ofruara për t’u bërë një platformë multidimensionale.
G.D/SCAN
AirBNB do t’ju paguajë për të jetuar në Itali 3 muaj – Ja si të aplikoni, afati i fundit
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.