Akademikët të përfshirë në hartimin e politikave dhe shkrimin e ligjeve. Këshilli i Ministrave marrëveshje me Fakultetin e Drejtësisë dhe e Ekonomisë
Për të pasur një qeverisje sa më të mirë, duhet që shkrimi i ligjeve të jetë sa më i qartë dhe i kuptueshëm për qytetarët, zyrtarët dhe subjektet që i zbatojnë. Kështu Këshilli i Ministrave, përfaqësuar nga Sekretari i Përgjithshëm, Engjëll Agaçi, nënshkroi sot, në ambientet e Kryeministrisë, në praninë e Kryeministrit Edi Rama, marrëveshje bilaterale me Fakultetin e Drejtësisë dhe të Ekonomisë, të Universitetit të Tiranës, përfaqësuar nga dekanët, Artan Hoxha dhe Dhori Kule.
“Procesi i shkrimit të ligjeve në një shoqëri po evidentohet çdo ditë e më shumë si një nga mjetet më të rëndësishme për realizimin e një qeverisjeje të mirë dhe të bazuar në parimet e shtetit të së drejtës janë hedhur hapa të rëndësishëm për të thithur më të mirët nga tregu i juristëve që sot ka në vend, me qëllim rritjen e kapaciteteve ligjplanifikuese dhe ligjshkruese në institucionet tona. I rëndësishëm ka qenë edhe krijimi i Njësisë së Monitorimit të Legjislacionit”, u shpreh Agaçi.
Këshilli i Ministrave dhe fakultetet u angazhuan për bashkëpunim të ngushtë në funksion të rritjes së efikasitetit në realizimin e objektivave të qeverisjes, përmes përmirësimit të procesit ligjbërës, planifikimit dhe hartimit të politikave.
“Thithja e ekspertizës më të mirë akademike dhe shkencore në procesin e hartimit të politikave dhe të kuadrit ligjor është jo thjesht një aset, një kontribut që i shtohet procesit ligjbërës në Shqipëri, por edhe një mundësi shumë e mirë për shkëmbimin e mendimeve mes teknokratëve dhe akademikëve për rritjen e nivelit të analizës së kuadrit ligjor, në nivele shkencore tashmë dhe rritjes së transparencës dhe konsulencës në këtë proces.” theksoi më tej Agaçi.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.