AKEP gati të shesë një tjetër brez frekuencash – 5G gjithashtu në perspektivë shitjeje
Autoriteti i Komunikimeve Elektronike dhe Postare gjatë mbledhjes së fundit ka vendosur të nisë këshillimin publik për dhënien në përdorim të brezit të frekuencave 800 MHz.
Kjo bandë do të përdoret nga operatorët e telekomunikacionit për ofrimin e shërbimeve celulare në rrjetet 4G LTE, ndërsa në Europë ky brez ka mbi pesë vjet që ka filluar të jepet në përdorim.
Nevoja për ofrimin e këtyre frekuencave vjen si pasojë e rritjes së konsiderueshme të përdorimit të internetit në popullsi, ndërsa është në përputhje me agjendën digjitale të Komisionit Europian. Ndër të tjera, kjo agjendë përcakton se ka nevojë për investime shtesë në rrjetet fikse me fibra optike, si dhe në rrjetet celulare duke alokuar frekuenca në brezin 700 MHz, i cili do të përdoret për teknologjinë 5G.
Kjo teknologji e internetit super të shpejtë është gjithashtu në planet e AKEP, menjëherë sapo të jetë zhvilluar më tej dhe aparatet celularë të nisin ta përfshijnë.
Tashmë AKEP do të nisë konsultimet me kompanitë celulare në vend, duke i pyetur se sa do të ishte vlera që janë gati të paguajnë për të drejtën e përdorimit të 2 blloqeve nga 5 MHz.
Pas vlerësimit të çmimit dhe kërkesës në treg, autoriteti pritet të shpallë procedurat për dhënien në përdorim për 15 vite.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.